TET परीक्षा आता ऑनलाईन; शिक्षण मंत्र्यांची विधान परिषदेत घोषणा
फेरपरीक्षा पारदर्शक पद्धतीने शिस्तबद्ध वातावरणात पार पाडण्यात येईल. टीईटी 2026 च्या फेर परीक्षेसाठी उमेदवारांकडून कोणत्याही प्रकारचे परीक्षा शुल्क आकारण्यात येणार नाही. पुढील वर्षापासून टीईटी व अन्य सर्व परीक्षा पूर्णतः शिस्तबद्ध वातावरणात ऑनलाइन पद्धतीने पार पाडण्याकरिता आवश्यक पायाभूत सुविधा निर्माण करण्यासाठी मुख्य सचिव यांच्या अध्यक्षतेखाली समिती नेमण्यात येईल.
eduvarta@gmail.com 
एज्युवार्ता न्यूज नेटवर्क
महाराष्ट्र राज्य परीक्षा परिषदेतर्फे घेतल्या जाणाऱ्या टीईटी परीक्षेचा पेपर फुटल्यामुळे सोमवारी विधानसभा व विधान परिषदेच्या सभागृहात गदारोळ झाला. सर्व आमदारांनी याबाबत सत्ताधाऱ्यांना धारेवर धरले. त्यावर शालेय शिक्षण मंत्री दादा भुसे यांनी सविस्तर निवेदन दिले. त्यात पुढील वर्षापासून टीईटी व अन्य सर्व परीक्षा पूर्णतः पारदर्शक व शिस्तबद्ध वातावरणात ऑनलाइन पद्धतीने पार पाडण्याकरिता आवश्यक पायाभूत सुविधा निर्माण करण्यासाठी मुख्य सचिव यांच्या अध्यक्षतेखाली समिती नेमण्यात येईल, असे दादा भुसे स्पष्ट केले. त्यामुळे पेपर फुटीनंतर आता शिक्षकांना पुढील वर्षापासून ऑनलाईन पद्धतीने टीईटी परीक्षा द्यावी लागणार आहे.
दादा भुसे म्हणाले, भिवंडी येथे पेपर फोडण्यासाठी आलेल्या तीन आरोपींना ताब्यात घेण्यात आले आहे. पोलीस महासंचालक यांच्या आदेशानुसार या प्रकरणाचा तपास करण्यासाठी एसआयटी स्थापन केली आहे. या गुन्ह्याचा तपास सुरू असून तपासासाठी बिहार, हरियाणा आणि दिल्ली येथे पथके रवाना करण्यात आली आहेत. 28 जून रोजी नियोजित करण्यात आलेल्या टीईटी परीक्षा पेपर फुटी प्रकरणी जे कोणी दोषी आढळतील त्या सर्वांना संघटित गुन्हेगारी कायद्याअंतर्गत गुन्हा नोंदविण्याबाबत कायद्यात आवश्यक ते बदल करण्याबाबत तपासणी केली जाईल.
पुढील TET परीक्षेबाबत माहिती देताना दादा भुसे म्हणाले, फेरपरीक्षा पारदर्शक पद्धतीने शिस्तबद्ध वातावरणात पार पाडण्यात येईल. टीईटी 2026 च्या फेर परीक्षेसाठी उमेदवारांकडून कोणत्याही प्रकारचे परीक्षा शुल्क आकारण्यात येणार नाही. पुढील वर्षापासून टीईटी व अन्य सर्व परीक्षा पूर्णतः शिस्तबद्ध वातावरणात ऑनलाइन पद्धतीने पार पाडण्याकरिता आवश्यक पायाभूत सुविधा निर्माण करण्यासाठी मुख्य सचिव यांच्या अध्यक्षतेखाली समिती नेमण्यात येईल.
एकूणच पेपर फुटीनंतर विधानसभेत गदारोळ झाल्यावर पारदर्शक पद्धतीने परीक्षा घेण्याची ग्वाही देण्यात आली. मात्र, यापूर्वी सुद्धा टीईटी परीक्षा ऑनलाईन पद्धतीने घेणे शक्य आहे का? याबाबत चाचपणी करण्यात आली होती. टीईटी परीक्षा वेगवेगळ्या आठ भाषांमध्ये घेतली जात असल्यामुळे ऑनलाईन पद्धतीने परीक्षा घेणे शक्य आहे का? त्यासाठी काय करावे लागेल. याचा अत्यंत सखोल अभ्यास केल्याशिवाय ऑनलाइन पद्धतीने टीईटी परीक्षा घेणे उचित ठरणार नसल्याचे तज्ञांकडून सांगितले जात आहे.
