स्वायत्त महाविद्यालयांच्या मनमानी शुल्क वसुलीला चाप
स्वायत्त महाविद्यालयांच्या शुल्कवाढीबाबत विविध विद्यार्थी संघटना व महाविद्यालयाच्या विद्यार्थ्यांकडून अनेक तक्रारी प्राप्त होतात. परंतु, आता या तक्रारींची दखल घेतली जाणार आहे.
Eduvarta
एज्युवार्ता न्यूज नेटवर्क
राज्यात गेल्या काही वर्षात स्वायत्त महाविद्यालयांच्या संख्येत वाढ होताना दिसत आहे. परंतु, या महाविद्यालयाकडून विविध अभ्यासक्रमांसाठी मनमानी पद्धतीने शुल्क वसुली केली जात असल्याचे समोर आले आहे. आता या महाविद्यालयांच्या शुल्कावर नियंत्रण ठेवण्यासाठी उच्च शिक्षण संचालक कार्यालयामध्ये 'एफआरए' स्थापन केले जाणार आहे, त्यामुळे लवकरच या महाविद्यालयांमधील मनमानी शुल्क वसुलीला चाप बसणार आहे, असे विश्वनीय सूत्रांनी सांगितले.
राष्ट्रीय शैक्षणिक धोरणानुसार स्वायत्त महाविद्यालयांची संख्या वाढवण्यावर तसेच महाविद्यालयाचे रूपांतर विद्यापीठांमध्ये वाढ करण्यावर भर देण्यात आला. त्यामुळे राज्यातील स्वायत्त महाविद्यालयांची संख्या सुमारे दीडशेपर्यंत पोहोचली आहे.परिणामी विद्यार्थ्यांना नवनवीन अभ्यासक्रम उपलब्ध झाले आहेत. परंतु, राज्य शासनाने निश्चित करून दिलेल्या शुल्काव्यतिरिक्त महाविद्यालयांना विद्यार्थ्यांकडून अधिकचे शुल्क आकारता येत नाही. मात्र अनेक महाविद्यालयाकडून मनमानी पद्धतीने शुल्क वसुली केली जात असल्याचे निदर्शनास आले आहे.
स्वायत्त महाविद्यालयांच्या शुल्कवाढीबाबत विविध विद्यार्थी संघटना व महाविद्यालयाच्या विद्यार्थ्यांकडून अनेक तक्रारी प्राप्त होतात. परंतु, आता या तक्रारींची दखल घेतली जाणार आहे. त्यामुळे विद्यार्थी व पालकांना मोठा दिलासा मिळणार आहे. विद्यार्थ्यांना स्वायत्त महाविद्यालयांमध्ये वाजवी शुल्कत नवनवीन अभ्यासक्रमांचे शिक्षण मिळावे, यासाठी उच्च शिक्षण संचालनालयातील 'एफआरए'च्या माध्यमातून नियंत्रण ठेवले जाणार आहे, असे सूत्रांनी सांगितले.
-----------------
स्वायत्त महाविद्यालयांबाबत राज्याचे उच्च व तंत्र शिक्षण मंत्री चंद्रकांत पाटील यांच्या अध्यक्षतेखाली उच्च शिक्षण विभागातर्फे वेळोवेळी आढावा बैठका घेतल्या जात आहेत. त्यातून काही महाविद्यालये विद्यार्थ्यांकडून अवाजवी शुल्क आकारणी करत असल्याचे निदर्शनास आले आहे. या पार्श्वभूमीवर स्वायत्त महाविद्यालयांच्या शुल्कावर नियंत्रण ठेवण्यासाठी सध्या अस्तित्वात असलेल्या FRAकडून किंवा स्वतंत्र प्राधिकरणाद्वारे नियंत्रण ठेवण्याबाबत चाचपणी केली जात आहे.
• डॉ. शैलेंद्र देवळाणकर, प्रभारी संचालक, उच्च शिक्षण, महाराष्ट्र राज्य
