'आयआयआयटी पुणे' येथे ३ नवे बीटेक अभ्यासक्रम सुरू, संस्थेकडून अधिकृत माहिती जाहीर 

एज्युवार्ता न्यूज नेटवर्क

भारतीय माहिती तंत्रज्ञान संस्था पुणे (IIIT Pune) येथे शैक्षणिक वर्ष २०२६-२७ पासून तीन नवीन बीटेक अभ्यासक्रम सुरू (3 new B.Tech courses launched) होणार आहेत. देशातील सेमीकंडक्टर, कृत्रिम बुद्धिमत्ता, सायबर सुरक्षा आणि डिजिटल अर्थव्यवस्थेच्या वाढत्या गरजा लक्षात घेऊन हे अभ्यासक्रम राष्ट्रीय शैक्षणिक धोरण २०२० (NEP-2020) नुसार तयार करण्यात आले आहेत. संस्थेचे संचालक प्रा. विनीत कंसल (Director Prof. Vineet Consul) यांनी पत्रकार परिषदेत ही माहिती दिली.

नवीन अभ्यासक्रमांमध्ये बीटेक सायबर सिक्युरिटी, बीटेक आर्टिफिशियल इंटेलिजन्स अँड डेटा सायन्स आणि बीटेक मायक्रोइलेक्ट्रॉनिक्स अँड व्हीएलएसआय डिझाइन यांचा समावेश आहे. प्रत्येक अभ्यासक्रमासाठी ६० जागा उपलब्ध असतील. हे अभ्यासक्रम भारताच्या सेमीकंडक्टर मिशन, संरक्षण क्षेत्र आणि सायबर सुरक्षा क्षेत्रातील वाढत्या मागणीनुसार डिझाइन करण्यात आले आहेत, असे प्रा. कंसल म्हणाले. 

अभ्यासक्रमांची गुणवत्ता वाढवण्यासाठी आयआयटी मुंबई, आयआयटी कानपूर आणि आयआयटी खरगपूर येथील प्राध्यापक नियमित मायक्रो-क्रेडिट कोर्सेस शिकवणार आहेत. याशिवाय आयबीएम इंडिया, अमेरिकेतील तज्ज्ञ आणि उद्योग क्षेत्रातील व्यावसायिकही विद्यार्थ्यांना प्रत्यक्ष वर्ग घेणार आहेत. यामुळे विद्यार्थ्यांना उद्योगाभिमुख आणि व्यावहारिक ज्ञान मिळणार आहे.

संस्थेच्या यंदाच्या प्लेसमेंटमध्ये विद्यार्थ्यांना वार्षिक ४५ लाख रुपयांपर्यंतचे सर्वोच्च पॅकेज मिळाले आहे. सरासरी पॅकेज १७.८८ लाख रुपये तर मध्यम पॅकेज १५ लाख रुपये आहे. इंटर्नशिपमध्ये विद्यार्थ्यांना दरमहा १.५ लाख रुपयांपर्यंतचे स्टायपेंड मिळाले असून, सरासरी स्टायपेंड ६० हजार रुपये आहे. ॲमेझॉन, आयबीएम, एनव्हिडिया, वॉलमार्ट, सेल्सफोर्स, टाटा इलेक्ट्रॉनिक्स, डिलॉइट, एचएसबीसी, टीसीएस रिसर्च, सी-डॅक, इन्फोसिस आणि बॉश सारख्या नामांकित कंपन्यांनी विद्यार्थ्यांना नोकऱ्या दिल्या आहेत.

आयआयआयटी पुणेने केलेल्या या विस्तारामुळे महाराष्ट्रातील तंत्रज्ञान शिक्षण क्षेत्राला निश्चितच चालना मिळणार असून, विद्यार्थ्यांना उच्च दर्जाचे आणि रोजगाराभिमुख शिक्षण उपलब्ध होणार आहे. इच्छुक विद्यार्थ्यांनी संस्थेच्या अधिकृत वेबसाइटवरून प्रवेश प्रक्रियेची माहिती घ्यावी, असे आवाहन करण्यात आले आहे.