NEET PG २०२६ परीक्षेत महत्त्वाचे बदल; २०० वरून १८० प्रश्न संख्या, परीक्षा एकाच शिफ्टमध्ये होणार

एज्युवार्ता न्यूज नेटवर्क

केंद्रीय आरोग्य मंत्रालयाने नीट पीजी  २०२६ साठी (NEET PG 2026) महत्त्वाचे बदल जाहीर (Important changes to the exam announced) केले आहेत. परीक्षा अधिक पारदर्शक, सुरक्षित आणि विद्यार्थ्यांसाठी सोयीची करण्याच्या उद्देशाने हे नवीन नियम लागू करण्यात आले आहेत. प्रश्नांची संख्या २०० वरून १८० करण्यात आली असून संपूर्ण परीक्षा एकाच शिफ्टमध्ये घेण्यात येणार आहे. यंदाची परीक्षा ३० ऑगस्ट २०२६ रोजी (Examination on 30 August 2026) घेण्यात येणार असून, आतापर्यंत २.७३ लाखांहून अधिक विद्यार्थ्यांनी नोंदणी (2.73 lakh students registered) केली आहे. ही संख्या गेल्या वर्षाच्या तुलनेत सुमारे १२.५ टक्क्यांनी जास्त आहे. नवीन बदलांमुळे विद्यार्थ्यांना परीक्षेची तयारी अधिक व्यवस्थित करता येणार आहे.

यंदापासून विद्यार्थ्यांना परीक्षा केंद्रासाठी तीन पसंतीची शहरे निवडण्याची संधी मिळणार आहे. मात्र, अर्जात दिलेल्या पत्रव्यवहाराच्या राज्याला प्रथम प्राधान्य द्यावे लागणार आहे. यामुळे विद्यार्थ्यांना दूरच्या शहरात किंवा दुसऱ्या राज्यात जाण्याची गरज भासणार नाही. तसेच, परीक्षा केंद्र कोणत्या शहरात असेल याची माहिती परीक्षेच्या तीन आठवडे आधी दिली जाणार असल्याने प्रवास, निवास आणि इतर तयारीसाठी पुरेसा वेळ उपलब्ध होणार आहे.

परीक्षेच्या स्वरूपातही महत्त्वाचा बदल करण्यात आला आहे. प्रश्नांची संख्या २०० वरून १८० करण्यात आली आहे. मात्र, एकूण परीक्षा वेळ २१० मिनिटे कायम ठेवण्यात आली आहे. यामुळे प्रत्येक प्रश्नासाठी विद्यार्थ्यांना अधिक वेळ मिळणार आहे. यावेळी संपूर्ण परीक्षा एकाच शिफ्टमध्ये घेण्यात येणार असल्याने सर्व उमेदवारांना समान कठीणतेची प्रश्नपत्रिका मिळेल आणि मूल्यमापन प्रक्रिया अधिक निष्पक्ष होईल, असा मंत्रालयाचा विश्वास आहे.

सुरक्षितता बाबतीत कडक उपाययोजना करण्यात आल्या आहेत. परीक्षा केंद्रांची पूर्वतपासणी, सीसीटीव्ही देखरेख, बायोमेट्रिक पडताळणी, आयरिस स्कॅन, सिग्नल जॅमर, लाईव्ह मॉनिटरिंग आणि स्वतंत्र निरीक्षकांची नियुक्ती केली जाणार आहे. प्रश्नपत्रिकेची संपूर्ण प्रक्रिया सुरक्षित डिजिटल एन्क्रिप्शनद्वारे पार पडेल. परीक्षा सुरळीत पार पाडण्यासाठी ६० हजारांहून अधिक कर्मचाऱ्यांची नियुक्ती करण्यात येणार आहे.

हे बदल विद्यार्थ्यांच्या हितासाठी आणि परीक्षेच्या गुणवत्तेसाठी करण्यात आल्याचे सांगण्यात आले आहे. एकाच शिफ्टमुळे नॉर्मलायझेशनची गरज पडणार नाही आणि निकाल प्रक्रिया अधिक सोपी व विश्वासार्ह होईल. विद्यार्थ्यांनी या नवीन नियमांची नोंद घेऊन तयारीला वेग द्यावा, असे आवाहनही करण्यात आले आहे. नीट पीजी २०२६ ही परीक्षा देशातील वैद्यकीय पदव्युत्तर अभ्यासक्रमांसाठी प्रवेशद्वार असल्याने या बदलांचे स्वागत विद्यार्थी वर्गाकडून होत आहे.