SPPU विद्यापीठाच्या विद्यार्थ्यांना श्री सदगुरू समूह देणार भारतीय ज्ञानपरंपरेचे धडे; व्यवस्थापन परिषदेची मंजूरी
सावित्रीबाई फुले पुणे विद्यापीठातर्फे रशियातील मॉस्को येथील रशियन पीपल्स फ्रेंडशिप विद्यापीठ (आरयूडीएन), जर्मनीमधील बायरॉईथ विद्यापीठ तसेच युनायटेड किंग्डममधील ससेक्स विद्यापीठ यांच्याशी शैक्षणिक, संशोधन आणि विद्यार्थी देवाणघेवाण कार्यक्रमांसाठी सामंजस्य करारांना विद्यापीठाच्या व्यवस्थापन परिषदेच्या बैठकीत मान्यता देण्यात आली.
eduvarta@gmail.com 
एज्युवार्ता न्यूज नेटवर्क
सावित्रीबाई फुले पुणे विद्यापीठाच्या व्यवस्थापन परिषदेमध्ये भारतीय ज्ञानपरंपरा आणि मूल्याधिष्ठित शिक्षणाला प्रोत्साहन देण्यासाठी पुण्यातील श्री सदगुरू समूहाच्या सहकार्याने भारतीय भाषा आणि भारतीय ज्ञान प्रणाली केंद्र तसेच भारतीय जीवनशैली आणि मूल्य शिक्षण या उपक्रमांच्या अंमलबजावणीस मंजुरी देण्यात आली. तसेच पुण्यातील राष्ट्रीय विषाणू विज्ञान संस्था (नॅशनल इन्स्टिट्यूट ऑफ व्हायरॉलॉजी) यांच्या सहकार्याने विद्यापीठाच्या जैवतंत्रज्ञान विभागात एम.एस्सी. (व्हायरॉलॉजी) हा विशेष पदव्युत्तर अभ्यासक्रम सुरू करण्यास मान्यता देण्यात आली. त्यामुळे विद्यार्थ्यांना जैवतंत्रज्ञान आणि विषाणूशास्त्र क्षेत्रात उच्च शिक्षणाच्या नव्या संधी उपलब्ध होणार आहेत.
विद्यापीठाच्या व्यवस्थापन परिषदेची बैठक कुलगुरू डॉ. सुरेश गोसावी यांच्या अध्यक्षतेखाली पार पडली. यावेळी प्र.कुलगुरू डॉ. पराग काळकर, प्रभारी कुलसचिव डॉ. प्रफुल्ल पवार व व्यवस्थापन परिषदेचे सदस्य उपस्थित होते. यावेळी विद्यापीठाच्या घासारलेल्या QS रँकिंगबाबत प्रश्न उपस्थित करण्यात आला.त्याचप्रमाणे विद्यार्थ्यांना दिल्या जाणाऱ्या सोई सुविधामध्ये सुधारणा करण्याची मागणी करण्यात आली.
सावित्रीबाई फुले पुणे विद्यापीठातर्फे रशियातील मॉस्को येथील रशियन पीपल्स फ्रेंडशिप विद्यापीठ (आरयूडीएन), जर्मनीमधील बायरॉईथ विद्यापीठ तसेच युनायटेड किंग्डममधील ससेक्स विद्यापीठ यांच्याशी शैक्षणिक, संशोधन आणि विद्यार्थी देवाणघेवाण कार्यक्रमांसाठी सामंजस्य करारांना विद्यापीठाच्या व्यवस्थापन परिषदेच्या बैठकीत मान्यता देण्यात आली. या करारांमुळे विद्यापीठाच्या विद्यार्थ्यांना आणि संशोधकांना जागतिक स्तरावरील शिक्षण आणि संशोधनाच्या संधी उपलब्ध होणार आहेत,असे विद्यापीठातर्फे कळविण्यात आले आहे.
तंत्रज्ञान क्षेत्रातील विद्यार्थ्यांना उद्योगाभिमुख आणि कौशल्याधारित शिक्षण उपलब्ध करून देण्यासाठी एड्युलॅब एज्युकेशन एक्स्चेंज प्रा. लि. यांच्या सहकार्याने विद्यापीठाच्या तंत्रज्ञान विभागामार्फत विविध प्रमाणपत्र आणि पदवी अभ्यासक्रम सुरू करण्यास मान्यता देण्यात आली. तसेच अहिल्यानगर उपकेंद्रामध्ये इतर मागासवर्गीय (ओबीसी) विद्यार्थ्यांसाठी नवीन वसतिगृह उभारण्यास मान्यता देण्यात आली. ग्रामीण आणि मागासवर्गीय विद्यार्थ्यांना उच्च शिक्षणासाठी आवश्यक निवास सुविधा उपलब्ध करून देण्याच्या दृष्टीने हा निर्णय घेण्यात आला.
महाराष्ट्र शासनाने तृतीयपंथीय विद्यार्थ्यांना मोफत शिक्षण देण्याचा निर्णय घेतला. त्यानुसार विद्यापीठाने या निर्णयाची अंमलबजावणी करण्याचा निर्णय घेतला.व्यवस्थापन परिषदेमध्ये तृतीयपंथीय विद्यार्थ्यांकडून कोणतेही शैक्षणिक शुल्क न आकारण्यास तत्त्वतः मान्यता देण्यात आली.तृतीयपंथीय विद्यार्थ्यांना उच्च शिक्षणाच्या मुख्य प्रवाहात आणण्यासाठी हा निर्णय घेतला गेला. ज्ञानसंपदेचे जतन आणि संरक्षणाच्या दृष्टीने विद्यापीठाच्या ऐतिहासिक आणि समृद्ध अशा जयकर ग्रंथालयाच्या विमा पॉलिसीच्या नूतनीकरणास देखील मान्यता देण्यात आली.
