संशोधनात्मक वातावरण निर्माण करण्यात कुलगुरू अयशस्वी; घसरलेल्या QS रँकिंगवरून अधिसभा सदस्य आक्रमक
विद्यमान कुलगुरू हे कोणतेही निर्णय वेळेत घेत नाहीत. कोणत्याच विषयावर ठाम भूमिका घेत नाहीत. विद्यापीठात संशोधनाला आवश्यक वातावरण निर्माण करण्यात कुलगुरू अयशस्वी झाले आहेत, असे अधिसभा सदस्यांचे मत आहे.
eduvarta@gmail.com 
एज्युवार्ता न्यूज नेटवर्क
ऑक्सफर्ड ऑफ द ईस्ट म्हणून ओळखल्या जाणाऱ्या सावित्रीबाई फुले पुणे विद्यापीठाच्या रँकिंगमध्ये दिवसेंदिवस घट होत असल्याने आता विद्यापीठाचे अधिसभा सदस्य सुद्धा आक्रमक झाले आहेत. विद्यापीठाचे कुलगुरू हे कोणतेही निर्णय वेळेत घेत नाहीत. त्यामुळे रँकिंगमध्ये घसरण होत चालली आहे. त्याचा परिणाम विद्यापीठातील प्रवेशावर होत आहे, त्यामुळे QS रँकिंग मधील सुधारणा या विषयावर चर्चा करण्यासाठी विद्यापीठाने विशेष अधिसभेची बैठक बोलवावी, अशी मागणी अधिसभा सदस्य विनायक आंबेकर यांनी केली आहे.
सावित्रीबाई फुले पुणे विद्यापीठाची NIRF रँकिंग मध्ये मोठी घसरण झाली. त्यावर विद्यापीठाच्या अधिसभा सदस्यांनी विद्यापीठाचे कुलगुरू तसेच विद्यापीठ प्रशासनाला धारेवर धरले होते. रँकिंग वाढीसाठी उपाययोजना कराव्यात अशी मागणी करण्यात आली होती. मात्र त्यानंतर विद्यापीठ प्रशासनाने कोणतेही ठोस निर्णय घेतले नाहीत. त्यात नुकत्याच जाहीर झालेल्या क्यू एस वर्ल्ड युनिव्हर्सिटी रँकिंग मध्ये जागतिक मानांकनात सावित्रीबाई फुले पुणे विद्यापीठ 791 ते 800 च्या दरम्यान फेकले गेले. 2025 मध्ये हे मानांकन 566 व्या क्रमांकावर होते. त्यामुळे यावर्षी विद्यापीठाच्या रँकिंगमध्ये मोठी घसरण झाली.
अधिसभा सदस्य विनायक आंबेकर यांनी विद्यापीठाचे कुलगुरू सुरेश गोसावी यांना पत्र लिहिले असून घसरलेल्या रँकिंगमुळे अधिसभा सदस्य आक्रमक झाले आहेत. विद्यमान कुलगुरू हे कोणतेही निर्णय वेळेत घेत नाहीत. कोणत्याच विषयावर ठाम भूमिका घेत नाहीत. विद्यापीठात संशोधनाला आवश्यक वातावरण निर्माण करण्यात कुलगुरू अपयशस्वी झाले आहेत, असे अधिसभा सदस्यांचे मत आहे.
या सर्व कारणांमुळे विद्यापीठाचा दर्जा घसरत चालला आहे आणि त्याचा परिणाम विद्यापीठातील प्रवेशावर सुद्धा झालेला दिसून येतो. या पार्श्वभूमीवर अधिसभा सदस्य विनायक आंबेकर यांनी कुलगुरूंना पत्र पाठविले आहे.
