आदिवासी पाड्यातील विद्यार्थी श्रेयस पाटकरची जागतिक भरारी; यूकेतील दोन नामांकित विद्यापीठांत मिळाला प्रवेश

एज्युवार्ता न्यूज नेटवर्क 

पुण्यातील कोरेगाव पार्क येथील आदिवासी मुलांच्या शासकीय वस्तीगृहातील विद्यार्थी श्रेयस पाटकर याचे उल्लेखनीय कामगिरी करत मोठे यश संपादन केले आहे.दुर्गम आदिवासी भागातून आलेल्या विद्यार्थ्यांनी आता जागतिक शैक्षणिक क्षेत्रातही आपली ठसा उमटवण्यास सुरुवात केली असून, त्याचे प्रेरणादायी उदाहरण म्हणजे श्रेयस पाटकर होय. पालघर जिल्ह्यातील उपलाट पाड्यातील तलासरी तालुक्यातील वारली कुटुंबातील श्रेयस पाटकर याची युनायटेड किंगडम (यूके) मधील जागतिक स्तरावर नामांकित अशा University of Bristol आणि University of Southampton या दोन प्रतिष्ठित विद्यापीठांमध्ये M.Sc. Data Science या अभ्यासक्रमासाठी प्रवेश निश्चित झाला आहे.

सध्या कु. श्रेयस पाटकर हा पीव्हीजी’स कॉलेज ऑफ इंजिनिअरिंग अँड टेक्नॉलॉजी, पुणे येथे B.Tech (Computer Science) या शाखेचे शिक्षण घेत आहे. अभियांत्रिकी शिक्षण घेत असतानाच त्याने परदेशातील उच्च शिक्षणाचे स्वप्न पाहिले आणि सातत्यपूर्ण परिश्रम, योग्य मार्गदर्शन व शैक्षणिक जिद्दीच्या बळावर त्याने हे यश संपादन केले आहे. विशेष म्हणजे, University of Bristol आणि University of Southampton ही दोन्ही विद्यापीठे जागतिक पातळीवर अत्यंत प्रतिष्ठित मानली जातात. QS World Ranking मध्ये 51 वा क्रमांक असलेल्या या विद्यापीठांमध्ये प्रवेश मिळवणे हे अत्यंत उल्लेखनीय मानले जाते.

 आदिवासी समाजातील, विशेषतः दुर्गम पाड्यातून आलेल्या विद्यार्थ्यासाठी ही उपलब्धी केवळ वैयक्तिक यश नसून, ती संपूर्ण आदिवासी समाजासाठी प्रेरणादायी घटना ठरत आहे. श्रेयस पाटकर याच्या या यशामागे आदिवासी मुलांचे शासकीय वस्तीगृह, कोरेगाव पार्क, पुणे येथे राबविण्यात आलेले विविध शैक्षणिक, व्यक्तिमत्त्व विकास व करिअर मार्गदर्शन उपक्रम, तसेच परदेशी शिक्षण व शिष्यवृत्ती संदर्भातील कार्यशाळा यांचा महत्त्वपूर्ण वाटा असल्याचे सांगितले जात आहे. वस्तीगृह स्तरावर विद्यार्थ्यांना जागतिक शैक्षणिक संधींची माहिती, अर्ज प्रक्रिया, शिष्यवृत्ती मार्गदर्शन आणि आत्मविश्वास वाढविणारे उपक्रम सातत्याने राबविण्यात आले. या सर्व उपक्रमांमुळे कु. श्रेयस याला आवश्यक दिशा, प्रेरणा आणि प्रोत्साहन मिळाले.

या यशामुळे आदिवासी विद्यार्थ्यांमध्ये नवचैतन्य निर्माण झाले असून, आदिवासी विकास विभागामार्फत राबविण्यात येणाऱ्या विविध योजनांचे हे एक सकारात्मक आणि ठोस फलित असल्याचे मानले जात आहे. शासनाच्या योजनांचा, संस्थात्मक मार्गदर्शनाचा आणि विद्यार्थ्यांच्या जिद्दीचा योग्य संगम झाल्यास आदिवासी भागातील विद्यार्थीही आंतरराष्ट्रीय स्तरावर उल्लेखनीय यश मिळवू शकतात, हे या उदाहरणातून अधोरेखित झाले आहे.

या उल्लेखनीय यशाबद्दल प्रदीप देसाई, प्रकल्प अधिकारी, एकात्मिक आदिवासी विकास प्रकल्प, घोडेगाव यांनी श्रेयस पाटकर याचे अभिनंदन करत पुढील शैक्षणिक वाटचालीसाठी शुभेच्छा दिल्या. त्यांनी सांगितले की, आदिवासी विद्यार्थ्यांनी उच्च शिक्षणाच्या क्षेत्रात अशी झेप घेणे ही अभिमानास्पद बाब असून, शासनाच्या योजनांचा लाभ घेत विद्यार्थी मोठ्या संधींपर्यंत पोहोचत असल्याचे हे उत्तम उदाहरण आहे.

 वस्तीगृहाचे गृहपाल उदय महाजन म्हणाले, “यावर्षी वस्तीगृहातील विद्यार्थी विविध क्षेत्रांमध्ये उल्लेखनीय यश संपादन करत आहेत. श्रेयस पाटकर याच्या या यशस्वी वाटचालीमुळे निश्चितच इतर आदिवासी विद्यार्थ्यांना नवी दिशा, प्रेरणा आणि आत्मविश्वास मिळेल. दुर्गम भागातील विद्यार्थीदेखील योग्य मार्गदर्शन, मेहनत आणि संधी यांच्या बळावर जागतिक स्तरावर पोहोचू शकतात, याचे हे उत्तम उदाहरण आहे.”

कु. श्रेयस पाटकर याच्या या यशामुळे केवळ त्याच्या कुटुंबाचा किंवा वस्तीगृहाचा नव्हे, तर संपूर्ण आदिवासी समाजाचा आणि आदिवासी विकास विभागाचा अभिमान उंचावला आहे. त्याची ही यशोगाथा दुर्गम भागातील अनेक विद्यार्थ्यांसाठी प्रेरणेचा दीपस्तंभ ठरणार आहे.