11th Admission : अकरावीचे 'कोटा अंतर्गत' दिल्या जाणाऱ्या प्रवेशाचे वेळापत्रक जाहीर 

एज्युवार्ता न्यूज नेटवर्क

राज्याच्या शालेय शिक्षण विभागातर्फे (Department of Education) राबविल्या जात असलेल्या अकरावी केंद्रीय ऑनलाईन प्रवेश प्रक्रियेतून (11th admission ) कोटांतर्गत दिल्या जाणाऱ्या प्रवेशाचे (quota admission ) वेळापत्रक प्रसिद्ध करण्यात आले आहे. त्यानुसार विद्यार्थ्यांना येत्या ८ जून पासून व्यवस्थापन कोटा, इनहाऊस कोटा आणि अल्पसंख्यांक कोट्यातून (management quota , in house quota, minority quota) प्रवेश घेण्यासाठी नोंदणी करावी लागणार आहे. त्याचप्रमाणे केंद्रीय प्रवेशासाठी सुद्धा प्रवेश अर्जातील दुसरा भाग भरणे गरजेचे आहे.

हेही वाचा: अकरावी प्रवेशाला सुरूवात; प्रवेश अर्जाचा पहिला भाग भरा या तारखेपासून

       राज्याच्या माध्यमिक शिक्षण संचालक कार्यालयातर्फे मुंबई ,पुणे व पिंपरी चिंचवड, नाशिक, अमरावती, नागपूर  महानगरपालिका क्षेत्रामधील कनिष्ठ महाविद्यालयांसाठी ऑनलाईन प्रवेश प्रक्रिया राबवली जात आहे. त्यासाठीचे सविस्तर वेळापत्रक https://11thadmission.org.in प्रसिद्ध करण्यात आले आहे.

     विद्यार्थ्यांना कोटा अंतर्गत प्रवेशासाठी ८ ते १२ जून या कालावधीत नोंदणी करावी लागेल. शून्य फेरी अंतर्गत १३ जून रोजी कोटा पसंती दिलेल्या विद्यार्थ्यांची गुणवत्ता यादी तयार केली जाईल. संबंधित विद्यार्थ्यांची गुणवत्ता यादी विद्यालय स्तरावर प्रसिद्ध केली जाईल, तसेच निवड झालेल्या विद्यार्थ्यांना कोर्टांतर्गत प्रवेशासाठी  विद्यालय स्तरावरून दूरध्वनीवरून संपर्क साधला जाईल. विद्यालयांना १३ ते १५ या कालावधीत कोटा अंतर्गत प्रवेश निश्चित करावे लागतील. तसेच १६ ते १८ जून या कालावधीत कोटानिहाय रिक्त राहिलेल्या जागा प्रसिद्ध केल्या जातील. त्यानंतर विद्यार्थी रिक्त जागांवर विद्यार्थी पुन्हा पसंतीक्रम  नोंदवू शकतील.

 'फेरी क्रमांक एक' या फेरीतील विद्यार्थ्यांची निवड यादी १९ जून रोजी प्रसिद्ध केली जाईल. यातून निवड झालेल्या विद्यार्थ्यांना १९ ते २२ जून या कालावधीत संबंधित कनिष्ठ महाविद्यालयात जाऊन आपला प्रवेश निश्चित करावा लागेल. येत्या २३ जून नंतर ऑनलाइन प्रवेश प्रक्रिया सुरू होईल, असे माध्यमिक व उच्च माध्यमिक शिक्षण सहसंचालक हरुण अत्तर यांनी कळविले आहे.