PCM ग्रुप दुसऱ्या संधीचा निकाल जाहीर: १२ विद्यार्थ्यांना १०० पर्सेंटाईल
या परीक्षेसाठी एकूण ३,२१,९१८ विद्यार्थ्यांनी नोंदणी केली होती, त्यापैकी २ लाख ८५ हजार १२१ (८८.५७%) विद्यार्थ्यांनी प्रत्यक्ष परीक्षा दिली. परीक्षा देणाऱ्यांमध्ये १ लाख ७४ हजार ६९८ विद्यार्थी, १ लाख १० हजार ४१३ विद्यार्थिनी आणि १० तृतीयपंथीय (Transgender) विद्यार्थ्यांचा समावेश होता.
eduvarta@gmail.com 
एज्युवार्ता न्यूज नेटवर्क
महाराष्ट्र राज्य सामाईक प्रवेश परीक्षा कक्षातर्फे (CET Cell) मे २०२६ मध्ये घेण्यात आलेल्या अभियांत्रिकी (Engineering), औषधनिर्माणशास्त्र (Pharmacy) व कृषी शिक्षण (Agriculture Education) या व्यावसायिक अभ्यासक्रमांच्या दुसऱ्या संधीच्या ‘MHT-CET (PCM)’ परीक्षेचा निकाल अखेर जाहीर झाला आहे. या परीक्षेत एकूण १२ विद्यार्थ्यांनी १०० पर्सेंटाईल गुण मिळले आहे. या निकालासोबतच सीईटी कक्षाने यावर्षीचे सर्व २० निकाल जाहीर केले असून, विद्यार्थ्यांचा निकाल त्यांच्या लॉगीनमध्ये उपलब्ध करून देण्यात आला आहे. या अभ्यासक्रमांची सामाईक प्रवेश प्रक्रिया (CAP Round) लवकरच सुरू करण्यात येणार आहे.
पीसीएम ग्रुपच्या दुसऱ्या संधीची ही परीक्षा १२ ते २० मे २०२६ या कालावधीत राज्यातील ३६ जिल्ह्यांमधील १८७ परीक्षा केंद्रांवर (CBT) पद्धतीने ११ सत्रांमध्ये घेण्यात आली. या परीक्षेसाठी एकूण ३,२१,९१८ विद्यार्थ्यांनी नोंदणी केली होती, त्यापैकी २ लाख ८५ हजार १२१ (८८.५७%) विद्यार्थ्यांनी प्रत्यक्ष परीक्षा दिली. परीक्षा देणाऱ्यांमध्ये १ लाख ७४ हजार ६९८ विद्यार्थी, १ लाख १० हजार ४१३ विद्यार्थिनी आणि १० तृतीयपंथीय (Transgender) विद्यार्थ्यांचा समावेश होता. यावर्षी महाराष्ट्राबाहेरील केंद्रांवर परीक्षा घेण्यात आली नाही, मात्र राज्याबाहेरील ४,७२५ विद्यार्थ्यांनी महाराष्ट्रात येऊन ही परीक्षा दिली.
राज्यातील १०० पर्सेंटाईल मिळवणारे विद्यार्थी
-
पुणे: आदित्य तोरवे, अथर्व अनिल घोरपडे, सुजल संतोष जाधव
-
मुंबई उपनगर: इप्शिता हेमंत निकाळे, हर्षवर्धन युवराज पाटील
-
भंडारा: शब्बर घाटीवाला, आदित्य सतीश वानखेडे
-
चंद्रपूर: मोहक संदीप चवले
-
रायगड: नचिकेत किसन येवले
-
वर्धा: प्रथा प्रशांत आगरवाल
या प्रवेश परीक्षेत १०० पर्सेंटाईल मिळवणाऱ्या १२ विद्यार्थ्यांपैकी १० विद्यार्थी महाराष्ट्रातील असून, २ विद्यार्थी इतर राज्यातील आहेत. विशेष म्हणजे, या १२ गुणवंतांमध्ये २ विद्यार्थिनींचा समावेश आहे.
प्रवर्गनिहाय सर्वोच्च पर्सेंटाईल मिळवणारे विद्यार्थी
| अ. क्र. | प्रवर्ग (Category) | विद्यार्थ्याचे नाव | जिल्हा | पर्सेंटाईल |
| १. | खुला प्रवर्ग (Open) |
१. अथर्व अनिल घोरपडे २. हर्षवर्धन युवराज पाटील ३. प्रथा प्रशांत आगरवाल ४. शब्बर घाटीवाला |
पुणे मुंबई उपनगर वर्धा भंडारा |
१०० १०० १०० १०० |
| २. | एससी (SC) | इप्शिता हेमंत निकाळे | मुंबई उपनगर | १०० |
| ३. | एसटी (ST) | अथर्व मोहन अरसेवाड | मुंबई उपनगर | ९९.६५ |
| ४. | ओबीसी (OBC) |
१. मोहक संदीप चवले २. नचिकेत किसन येवले ३. आदित्य सतीश वानखेडे |
चंद्रपूर रायगड भंडारा |
१०० १०० १०० |
| ५. | एसबीसी (SBC) | निलेश शिवाजी अकोस्कर | पुणे | ९९.९३ |
| ६. | एसइबीसी (SEBC) | विनायक श्रीधर लोखंडे | परभणी | ९९.९८ |
| ७. | डीटी/ व्हिजे (DT/VJ) | संस्कृती गजानन राठोड | बुलढाणा | ९९.९९ |
| ८. | एनटी १ बी (NT1 B) | सुजल संतोष जाधव | पुणे | १०० |
| ९. | एनटी २ सी (NT2 C) | आदित्य तोरवे | पुणे | १०० |
| १०. | एनटी ३ डी (NT3 D) | प्रज्वल सिद्धेश्वर मुंडे | परभणी | ९९.९७ |
राष्ट्रीय स्तरावर जेईई (JEE Main) परीक्षेप्रमाणेच महाराष्ट्रातील विद्यार्थ्यांनाही दोनदा परीक्षेची संधी मिळावी, म्हणून राज्याचे उच्च व तंत्रशिक्षण मंत्री चंद्रकांत पाटील यांच्या निर्देशानुसार यंदापासून एमएचटी सीईटी (PCM व PCB समूह) आणि एमबीए/एमएमएस अभ्यासक्रमांसाठी 'दोन वेळेस परीक्षा' घेण्याचा ऐतिहासिक निर्णय घेण्यात आला. ज्या विद्यार्थ्यांनी दोन्ही वेळेस परीक्षा दिली आहे, त्यांच्या दोन्ही निकालांपैकी ज्या परीक्षेत जास्त पर्सेंटाईल मिळाले असतील, तोच निकाल प्रवेश प्रक्रियेसाठी ग्राह्य धरला जाणार आहे. यामुळे विद्यार्थ्यांचे मोठे शैक्षणिक नुकसान टळणार आहे.
