NTA चा नियोजन शून्य कारभार पुन्हा चव्हाट्यावर, NEET च्या विद्यार्थ्याला अबुधाबीचे परीक्षा केंद्र 

एज्युवार्ता न्यूज नेटवर्क 

राष्ट्रीय परीक्षा एजन्सी (NTA) च्या कारभारावरील प्रश्नचिन्हे कायम असतानाच NEET-UG 2026 पुनर्परीक्षेपूर्वी आणखी एक धक्कादायक प्रकार समोर आला आहे. नागपूरमधील 18 वर्षीय उमेदवार अब्दुल्लाह मोहम्मद तालिब याला पुनर्परीक्षेसाठी थेट दुबईतील अबूधाबी इंडियन स्कूल हे परीक्षा केंद्र देण्यात आल्याने विद्यार्थी आणि त्याच्या कुटुंबीयांमध्ये मोठी खळबळ उडाली आहे.

अब्दुल्लाहने अर्ज भरताना नागपूर, वर्धा आणि भंडारा ही स्थानिक परीक्षा केंद्रे प्राधान्याने निवडली होती. मात्र प्रवेशपत्र डाउनलोड केल्यानंतर त्याला परीक्षा केंद्र म्हणून अबूधाबी इंडियन स्कूलचे नाव दिसल्याने तो आणि त्याचे कुटुंबीय हादरले. विदेशात जाऊन परीक्षा देण्याचा प्रश्न निर्माण झाल्याने कुटुंबीयांची चिंता वाढली. विद्यार्थ्याकडे पासपोर्ट किंवा व्हिसा नसल्याने परिस्थिती अधिकच गंभीर बनली.

विद्यार्थ्याचे वडील यांनी तत्काळ NTA हेल्पलाइनशी संपर्क साधला. सुरुवातीला कुटुंबीयांनी प्रवासाच्या शक्यतेचाही विचार सुरू केला होता. मात्र पेपर लीक प्रकरणामुळे आधीच मानसिक तणावाखाली असलेल्या विद्यार्थ्यावर या प्रकाराचा अतिरिक्त ताण पडल्याचे कुटुंबीयांनी सांगितले.

या प्रकरणाची दखल घेत NTA ने ही "तांत्रिक चूक" असल्याचे स्पष्ट केले आहे. डेटा मॅचिंग प्रक्रियेदरम्यान झालेल्या त्रुटीमुळे चुकीचे परीक्षा केंद्र वाटप झाल्याचे एजन्सीने सांगितले. विद्यार्थ्याला आज संध्याकाळपर्यंत किंवा उद्या सकाळपर्यंत सुधारित प्रवेशपत्र देण्यात येईल आणि त्यात नागपूर किंवा जवळचे परीक्षा केंद्र दिले जाईल, असे आश्वासन NTA कडून देण्यात आले आहे.

दरम्यान, या घटनेमुळे सोशल मीडियावर NTA वर टीकेची झोड उठली आहे. विरोधी पक्षांसह विविध राजकीय नेते आणि शिक्षण क्षेत्रातील तज्ज्ञांनी विद्यार्थ्यांच्या भविष्याशी खेळ होत असल्याचा आरोप केला आहे. विद्यार्थ्यांचे शैक्षणिक वर्ष, मानसिक आरोग्य आणि परीक्षेची तयारी यावर अशा घटनांचा गंभीर परिणाम होत असल्याची भावना व्यक्त केली जात आहे. माजी शिक्षणमंत्र्यांसह अनेक नेत्यांनी या प्रकरणात NTA ला जबाबदार धरले आहे.

यापूर्वी NEET-UG 2026 परीक्षा पेपर लीक प्रकरणामुळे वादाच्या भोवऱ्यात सापडली होती. त्यानंतर ही परीक्षा रद्द करण्यात आली आणि 21 जून रोजी पुनर्परीक्षा घेण्याचा निर्णय घेण्यात आला. अशा परिस्थितीत परीक्षा केंद्र वाटपातील हा नवीन घोळ NTA च्या कार्यक्षमतेवर पुन्हा एकदा प्रश्नचिन्ह निर्माण करणारा ठरत आहे.

उद्याच्या पुनर्परीक्षेसाठी देशभरातील 22 लाखांहून अधिक विद्यार्थी सहभागी होणार आहेत. परीक्षा दुपारी 2 ते 5.15 या वेळेत होणार असून बायोमेट्रिक पडताळणी, सीसीटीव्ही देखरेख आणि कडक सुरक्षा व्यवस्थेची अंमलबजावणी करण्यात आल्याचे NTA ने म्हटले आहे.