MPSC : मुख्य परीक्षेचे प्रवेशपत्र उमेदवारांच्या खात्यात उपलब्ध, सोबत महत्त्वाच्या सूचना
आयोगाने परीक्षेच्या दिवशी ऐनवेळी उद्भवणाऱ्या अडचणींचा विचार करून महत्त्वाच्या सूचना जारी केल्या आहेत. परीक्षा सुरू होण्याच्या किमान दीड तास अगोदर संबंधित परीक्षा उपकेंद्रावर उपस्थित राहणे बंधनकारक आहे.
eduvarta@gmail.com 
एज्युवार्ता न्यूज नेटवर्क
महाराष्ट्र लोकसेवा आयोगाने (MPSC) महाराष्ट्र स्थापत्य अभियांत्रिकी सेवा मुख्य परीक्षा २०२५ साठीचे (Engineering Services Main Examination) प्रवेश प्रमाणपत्र (Admit Card) उमेदवारांच्या खात्यामध्ये ऑनलाइन उपलब्ध करून दिले आहेत. शनिवार, दि. १६ मे २०२६ रोजी होणाऱ्या या परीक्षेसाठी (16 May Exam) उमेदवारांनी आयोगाच्या अधिकृत संकेतस्थळावरून प्रवेशपत्र डाउनलोड करून प्रिंट घेणे अनिवार्य आहे. आयोगाने स्पष्ट केले आहे की, मूळ स्वरूपातील प्रवेश प्रमाणपत्र सोबत न घेतल्यास परीक्षेसाठी प्रवेश दिला जाणार नाही. केवळ डाउनलोड केलेले सॉफ्ट कॉपी किंवा फोटो दाखवून उमेदवारांना परीक्षा केंद्रावर प्रवेश (Examination Center) मिळणार नाही. त्यामुळे उमेदवारांनी प्रवेशपत्र छपाई करून मूळ प्रती सोबत ठेवावी, असे आवाहन करण्यात आले आहे.
आयोगाने परीक्षेच्या दिवशी ऐनवेळी उद्भवणाऱ्या अडचणींचा विचार करून महत्त्वाच्या सूचना जारी केल्या आहेत. परीक्षा सुरू होण्याच्या किमान दीड तास अगोदर संबंधित परीक्षा उपकेंद्रावर उपस्थित राहणे बंधनकारक आहे. तसेच, परीक्षा कक्षात स्वतःच्या बैठक क्रमांकावर परीक्षा सुरू होण्याच्या एक तास अगोदर पोहोचणे अनिवार्य आहे. वाहतूक कोंडी, अतिवृष्टी, आंदोलने किंवा इतर अनपेक्षित घटनांचा सामना करावा लागू शकतो, त्यामुळे उमेदवारांनी पुरेसा वेळ राखून ठेवावा.
आयोगाने बजावले आहे की, कोणत्याही उमेदवाराने दिलेल्या सूचनांचे उल्लंघन केल्यास आयोगाच्या स्वेच्छाधिकारानुसार ठराविक कालावधीसाठी किंवा कायमस्वरूपी डिबार (Debar) करण्यात येईल. तसेच, प्रचलित कायद्यानुसार कारवाई करण्यात येईल.प्रवेशपत्र डाउनलोड करताना किंवा इतर कोणत्याही अडचणी आल्यास उमेदवारांनी आयोगाच्या contact-secretary@mpsc.gov.in (mailto:contact-secretary@mpsc.gov.in) किंवा support-online@mpsc.gov.in (mailto:support-online@mpsc.gov.in) या ई-मेलवर संपर्क साधावा. दूरध्वनीवर मदत हवी असल्यास ०२२-६९१२३९१४ किंवा ७३०३८२१८२२ या क्रमांकांवर विहित वेळेत संपर्क करावा, असे आयोगाने सांगितले आहे.उमेदवारांनी परीक्षा केंद्रावर जाण्यापूर्वी सर्व आवश्यक कागदपत्रे, फोटो ओळखपत्र, पेन इत्यादी वस्तू तयार ठेवाव्यात. आयोगाच्या सर्व सूचनांचे काटेकोरपणे पालन करून उमेदवारांनी परीक्षेसाठी तयारी करावी, असे आवाहन करण्यात आले आहे.
