डी.फार्मसी उत्तीर्णांना संधी द्या;अनुभवाची अट रद्द करा..

एज्युवार्ता न्यूज नेटवर्क 

नवी मुंबई महानगरपालिकेत (Navi Mumbai Municipal Corporation Recruitment) आस्थापनेवरील गट -क व गट -ड मधील विविध संवर्गातील ६२० रिक्त पदे (620 posts in Group-C and Group-D cadres) भरण्यात येत आहेत. जाहिरातीनुसार, औषध निर्माता/औषध निर्माण अधिकारी पदांच्या एकूण १२ जागा भरण्यात येणार आहेत. मात्र, यासाठी २ वर्षे अनुभव आणि पदवीचे शिक्षण घेतलेलेच उमेदवार पात्र ठरतील अशी अट घालण्यात आली आहे. मात्र, याला महाराष्ट्र फाॅर्मसी फोरम ने तीव्र विरोध दर्शविला आहे. यातील अनुभवाची अट काढून डी. फार्मसीचे शिक्षण पूर्ण केलेल्या विद्यार्थ्यांना पात्र ठरवण्याची मागणी करण्यात आली आहे. याबाबत नवी मुंबई महानगरपालिकेचे आयुक्त कैलास शिंदे यांना निवेदन देण्यात आले आहे. 

या भरती मोहिमेअंतर्गत क संवर्गातील बायोमेडिकल इंजिनियर,  कनिष्ठ अभियंता (स्थापत्य),  कनिष्ठ अभियंता (बायोमेडिकल इंजिनियरींग), उद्यान अधिक्षक, सहाय्यक माहिती व जनसंपर्क अधिकारी,  वैद्यकीय समाजसेवक,  डेंटल हायजिनिस्ट, स्टाफ नर्स/नर्स मिडवाईफ,  डायलिसिस तंत्रज्ञ, सांख्यिकी सहाय्यक,  इसीजी तंत्रज्ञ,  सी.एस.एस.डी. तंत्रज्ञ,  आहार तंत्रज्ञ,  नेत्र चिकित्सा सहाय्यक,  औषध निर्माता/औषध निर्माण अधिकारी,  आरोग्य सहाय्यक,  बायोमेडिकल इंजिनियर सहाय्यक,  पशुधन पर्यवेक्षक,  ऑक्झिलरी नर्स मिडवाईफ,  बहुउद्देशीय आरोग्य कर्मचारी,  शस्त्रक्रियागृह सहाय्यक,  सहाय्यक ग्रंथपाल,  वायरमन,  ध्वनी चालक,  उद्यान सहाय्यक,  लिपीक-टंकलेखक, लेखा लिपिक ही पदे भरती जाणार आहेत तर ड संवर्गातील शवविच्छेदन मदतनीस,  कक्षसेविका, कक्षसेवक ही पदे भरती जाणार आहेत.  

भरती बाबतचा तपशील व ऑनलाईन अर्ज करण्यासाठी नवी मुंबई महानगरपालिकेच्या संकेतस्थळाला भेट द्यावी. तसेच संवर्गनिहाय भरावयाची पदे, पदांचा तपशील, वेतनश्रेणी, वयोमर्यादा/वयोमर्यादा शिथिलता, निवड पद्धत, सर्व साधारण सूचना, अटी व शर्ती, शैक्षणिक अर्हता, सामाजिक व समांतर आरक्षण तसेच आरक्षणाबाबत तरतूदी, पदनिहाय ऑनलाईन परीक्षेचा अभ्यासक्रम, परीक्षा शुल्क, अर्ज भरणेबाबत मार्गदर्शक सूचना इत्यादी बाबतचा तपशील www.nmmc.gov.in या संकेतस्थळावर उपलब्ध आहे.
____________________________________

सार्वजनिक आरोग्य विभाग DHS, DMER वैद्यकीय शिक्षण विभाग, जिल्हा परिषद ZP, ESIC, RRB,  मुंबई महानगरपालिका वरील सर्व विभागामध्ये अनुभवाची अट नाही. मात्र, नवी मुंबई महानगरपालिकेच्या जाहिरातीमध्ये २ वर्षे अनुभवाची अट घालण्यात आलेली आहे.  त्यामुळे राज्यातील हजारो विद्यार्थी अनुभवामुळे अपात्र ठरत आहे. शासन स्तरावर पाठपुरावा करून सर्व फार्मसी विद्यार्थ्यांना पात्र ठरवून विद्यार्थ्यांना परीक्षेला बसण्याची संधी द्यावी. 

- अदित्य वगरे, डायरेक्टर महाराष्ट्र फाॅर्मसी फोरम