MBBSचे विद्यार्थी आता पहिल्या वर्षापासूनच घेणार 'एक कुटुंब दत्तक'

एज्युवार्ता न्यूज नेटवर्क 

राष्ट्रीय वैद्यकीय आयोगाने (NMC) 2023-24 पासून सर्व MBBS विद्यार्थ्यांसाठी कुटुंब दत्तक कार्यक्रम (Family Adoption Program for Students) लागू केला आहे. या कार्यक्रमांतर्गत आता प्रत्येक विद्यार्थ्याला त्याच्या अभ्यासाच्या काळात काही कुटुंब दत्तक घ्यावे लागेल आणि त्यांच्या आरोग्याची काळजी घ्यावी लागेल आणि याची सुरुवात विद्यार्थ्यांना त्यांच्या अभ्यासक्रमाच्या पहिल्या वर्षापासून करावी लागणार आहे. 

या कार्यक्रमाविषयी अधिक माहिती देताना आयोगाच्या पदवीपूर्व वैद्यकीय शिक्षण मंडळाच्या अध्यक्षा डॉ. अरुणा व्ही. वणीकर (President of Undergraduate Medical Education Board Dr. Aruna V. Vanikar) म्हणाल्या, "वर्गात शिकवण्यासोबतच विद्यार्थ्यांना त्यांच्या अभ्यासाच्या पहिल्या वर्षापासून लोकांची आरोग्य तपासणी करण्याची संधी देण्यात आली आहे. एमबीबीएसला प्रवेश घेणाऱ्या प्रत्येक विद्यार्थ्याला अभ्यासाच्या पहिल्या वर्षापासूनच कुटुंबाची काळजी घेणे सुरू करावे लागेल. कम्युनिटी आउटरीच कार्यक्रमांतर्गत किती कुटुंबांना मदत झाली हे देखील पाहिले जाईल. याशिवाय महाविद्यालयांना  ग्रामीण भागात वैद्यकीय शिबिरे व आरोग्य तपासणी शिबिरे आयोजित करावी लागतील."

दरम्यान, 11 जून ते 7 ऑगस्ट 2024 या काळात आयोगाकडून देशातील 28 राज्यांतील विविध जिल्हे आणि शहरांमध्ये आरोग्य शिबिरे आयोजित करण्यात आली होती, ज्यामध्ये देशातील 496 वैद्यकीय महाविद्यालयातील 85% एमबीबीएस विद्यार्थ्यांनी सहभाग घेतला होता. या तपासणीच्या आधारे आयोगाने  पहिला सर्वेक्षण अहवाल २०२४ जाहीर केला आहे. ज्यामध्ये हे समोर आले आहे की मोठ्या संख्येने लोकांना बीपी, शुगर, ॲनिमिया इत्यादी आजारांबद्दल माहिती नव्हती.

या अहवालातील आकडेवारीनुसार 40,829 मुलांपैकी 31% मुलांना  ॲनिमिया असल्याचे समोर आले आहे. याशिवाय 38% महिलांमध्ये ही समस्या आढळून येते. तर 39% गर्भवती महिलांमध्ये आणि 19% पुरुषांमध्ये ॲनिमिया आढळून आला.    शिबिरात  2,73,656 कुटुंबातील 12,09,338 लोकांची आरोग्य तपासणी करण्यात आली. यापैकी बीपीची समस्या 17% लोकांमध्ये  आणि साखरेची समस्या 14% लोकांमध्ये आढळली.