CET CEll बी.एड मध्ये फेल, 'त्या' विद्यार्थ्यांची ५ एप्रिलला पुन्हा परीक्षा

एज्युवार्ता न्यूज नेटवर्क 

राज्य सामाईक प्रवेश परीक्षा (State Common Entrance Test) कक्षा अर्थात सीईटी सेल बी.एड प्रवेश परीक्षा (B.Ed Entrance Exam) घेण्यात पूर्णपणे फेल झाल्याचे समोर आले आहे. परीक्षा केंद्रावरील तांत्रिक बिघाडामुळे (Technical Fault) नांदेड येथील मराठवाडा ऑनलाइन एक्झाम सेंटर, परभणी येथील एमजीएम अकॅडमी व नागपूर येथील वैनगंगा अभियांत्रिकी महाविद्यालय येथील परीक्षा केंद्रावरील विद्यार्थ्यांची बीएडची सीईटी परीक्षा रद्द (B.Ed. CET Exam Cancelled) करण्याची नामूष्की सीईटी सेलवर ओढावली. आता या परीक्षा केंद्रावरील विद्यार्थ्यांची सीईटी परीक्षा आता ५ एप्रिलला (CET Exam April 5) घेण्याचा निर्णय सीईटी सेलने घेतला आहे.

बीएडच्या सीईटी परीक्षेला १ लाख १० हजार ४२ विद्यार्थ्यांनी नोंदणी केली होती. त्यानुसार बीएड सीईटीची परीक्षा २७, २८, २९ मार्च २०२६ या तीन दिवसांत दोन सत्रात ही संपन्न झाली. मात्र,  नांदेड येथील मराठवाडा ऑनलाइन एक्झाम सेंटर, परभणी येथील एमजीएम अकॅडमी व नागपूर येथील वैनगंगा अभियांत्रिकी महाविद्यालय येथील परीक्षा केंद्रावरील विद्यार्थ्यांची बीएडची सीईटी परीक्षा रद्द करण्यात आली होती. संगणकांमध्ये बिघाड झाल्याने या केंद्रांवरील परीक्षा सुरूच होऊ शकली नाही.

त्यामुळे परीक्षा रद्द करून त्या पुढे ढकलण्याचा निर्णय सीईटी सेलने घेतला होता. त्यानुसार ५ एप्रिलला परीक्षा होणार आहेत. बीएड (जनरल व स्पेशल) व बीएड (ईएलसीटी) विद्यार्थ्यांना परीक्षा केंद्रांची माहिती, परीक्षेची वेळ ही नोंदणीकृत ईमेल आयडी व मोबाइल फोनवर पाठविण्यात येईल. तसेच विद्यार्थ्यांनी सुधारित प्रवेशपत्र लॉगइन आयडीमधून डाउनलोड करण्याचे आवाहन सीईटी कक्षाने केले आहे. त्यामुळे एकंदरीत बीएड परीक्षेची पार्श्वभूमी पाहिली तर सीईटी सेल बी.एडमध्ये फेल अशीच म्हणण्याची वेळ आली आहे.