SPPU NEWS:विद्यापीठातील CCTV कॅमेरा यंत्रणेची लागली वाट; निनावी पत्रातून पोलखोल
विद्यापीठात बसवण्या आलेल्या सुमारे 200 कॅमेऱ्यांपैकी शंभरहून अधिक कॅमेरे नादुरुस्त असल्याचे विश्वसनीय सूत्रांकडून सांगितले जात आहे.
Eduvarta
एज्युवार्ता न्यूज नेटवर्क
सावित्रीबाई फुले पुणे विद्यापीठातील सीसीटीव्ही कॅमेरा यंत्रणेची वाट लागली असून विद्यापीठातील सुमारे 50 टक्क्याहून अधिक कॅमेरे बंद आहेत.त्यात महापुरूषांच्या पुतळ्याजवळील चित्रीकरण करणारे काही कॅमेरे सुद्धा बंद अवस्थेत असून .विद्यापीठाकडून याकडे दुर्लक्ष होत असल्याचे दिसून येत आहे. त्यातच सीसीटीव्ही कॅमेऱ्यासंदर्भात एक निनावी पत्र विद्यापीठाच्या अधिकार मंडळाच्या सदस्यांना पाठविण्यात आले आहे. यामध्ये अत्यंत गंभीर बाबी नमूद करण्यात आल्या आहेत.त्यामुळे विद्यापीठातील काही कर्मचाऱ्यांसह विद्यापीठाला उपकरणे पुरवणाऱ्या व्हेंडरचे धाबे दणाणणले आहेत.
सावित्रीबाई फुले पुणे विद्यापीठाची इमारत ही हेरिटेज वास्तू म्हणून ओळखले जाते. या वास्तुसह विद्यापीठ परिसरात उभारण्यात आलेल्या महापुरुषांच्या पुतळ्यांची योग्य देखरेख ठेवणे गरजेचे आहे. त्याचबरोबर विद्यापीठात येणाऱ्या जाणाऱ्या व्यक्तींच्या हालचालीवर लक्ष ठेवण्यासाठी सीसीटीव्ही कॅमेरे उपयुक्त ठरतात. परंतु, विद्यापीठात बसवण्या आलेल्या सुमारे 200 कॅमेऱ्यांपैकी शंभरहून अधिक कॅमेरे नादुरुस्त असल्याचे विश्वसनीय सूत्रांकडून सांगितले जात आहे.
विद्यापीठातील कॅमेरे बसवण्यासाठी एका विशिष्ट व्हेंडरला काम दिले जाते. कॅमेऱ्यासाठी लागणारी काही तांत्रिक उपकरणे ही जुन्याची नवीन केली आणि नवीन गायब केली, व्हेंडर खिशातलाच असल्याने हा प्रकार बिंदिकत करून विद्यापीठाची खूप मोठी आर्थिक हानी केली. कोणत्याही प्रकारचे ऑडिट न करता भ्रष्टाचार करून विद्यापीठाच्या सुरक्षा विभागाच्या गळ्यात विद्यापीठातील संपूर्ण सीसीटीव्ही कॅमेरेची व्यवस्था घातली. बंद पडलेले कॅमेरे, बंद पडलेली उपकरणे यामुळे विद्यापीठातील सुरक्षेवर प्रश्नचिन्ह उभे राहतात. या सर्वाचा अतिरिक्त ताण कोणताही दोष नसणाऱ्या विद्यापीठाच्या सुरक्षा विभागावर येत आहे, याची गंभीर दखल घेणे अत्यंत गरजेचे आहे, असा आरोप विद्यापीठाच्या अधिकार मंडळातील सदस्यांना पाठविण्यात आलेल्या निनावी पत्रात करण्यात आला आहे.
----------------------------------------------
विद्यापीठ परिसरात बसविण्यात आलेले सीसीटीव्ही कॅमेरे चालू आहेत की बंद आहेत, याबाबत मी स्वतः कंट्रोल पॅनेलची माहिती घेतली.त्यात काही त्रुटी आढळून आल्या आहेत.या त्रुटी दोन दिवसात दूर केल्या जातील. सुरक्षेच्या दृष्टीने सीसीटीव्ही कॅमेरा यंत्रणा सक्षम असणे गरजेचे आहे, त्यामुळे याबाबत तात्काळ आवश्यक उपयोजना करण्याच्या सूचना देण्यात आल्या आहेत.
डॉ. सुरेश गोसावी, कुलगुरू, सावित्रीबाई फुले पुणे विद्यापीठ, पुणे
