पुणे पुस्तक महोत्सवाचे शनिवारी उद्घाटन; वाहतुकीत केला बदल

एज्युवार्ता न्यूज नेटवर्क  

वाचन संस्कृती जोपासणारे आणि वाचन चळवळ वाढवणाऱ्या तसेच वाचकांसाठी पुस्तकांची ८०० दालने, मुलांसाठी चिल्ड्रेन कॉर्नर, युवक - युवतींसाठी रंगारंग सांस्कृतिक कार्यक्रम, रसिक श्रोत्यांसाठी पुणे लिटरेचर फेस्टिव्हल आणि खवय्यांसाठी ४० पेक्षा अधिक खाद्यपदार्थांचे स्टॉल असणाऱ्या अशा विविधतेने नटलेल्या पुणे पुस्तक महोत्सवाचे (Pune Book Festival)उद्घाटन येत्या १३ डिसेंबर रोजी सायंकाळी ५ वाजता होणार आहे. या महोत्सवात सर्व भारतीय भाषांमधील पुस्तके खरेदीसाठी उपलब्ध असून, या पुस्तकांच्या खरेदीवर १० टक्के सवलत हे. त्यामुळे अधिकाधिक नागरिकांनी पुणे पुस्तक महोत्सवाला भेट देऊन, वाचन संस्कृतीला वाढविण्यासाठी पुढे यावे,असे  आवाहन पुणे पुस्तक महोत्सवाचे मुख्य संयोजक राजेश पांडे (Rajesh Pandey, Chief Organizer of Pune Book Festival)यांनी केले आहे.

पांडे म्हणाले की, पुणे पुस्तक महोत्सवाची सर्व तयारी पूर्ण झाली आहे. फर्ग्युसन महाविद्यालयाच्या मैदानावर १३ ते २१ डिसेंबर या कालावधीत हा महोत्सव उत्साहात पार पडत आहे. पुणे पुस्तक महोत्सवाच्या उद्घाटनाप्रसंगी पुणे शहरातील विविध महाविद्यालयांच्या वतीने ज्ञान सरिता ग्रंथ दिंडी काढण्यात येणार आहे. ही ग्रंथ दिंडी भारतीय ज्ञान प्रणाली (आयकेएस) या संकल्पनेवर आधारित राहणार असून, त्यात शहरातील ७५ महाविद्यालयांच्या विविध विषयावर दिंड्या राहणार आहेत. या दिंडीची सुरुवात दुपारी अडीच वाजता मॉडर्न महाविद्यालयातून होऊन ती जंगली महाराज रस्त्याने फर्ग्युसन महाविद्यालयात सायंकाळी पाचच्या सुमारास पोहोचेल. त्यानंतर सुमारे सात हजार विद्यार्थी आणि नागरिकांच्या उपस्थितीत महोत्सवाचे उद्घाटन करण्यात येईल. 

अखिल भारतीय मराठी साहित्य संमेलनाचे अध्यक्ष विश्वास पाटील, उच्च व तंत्रशिक्षण मंत्री चंद्रकांत पाटील, केंद्रीय नागरी वाहतूक राज्यमंत्री मुरलीधर मोहोळ यांच्यासह साहित्य आणि शिक्षण क्षेत्रातील नामांकित व्यक्ती यावेळी उपस्थित राहतील. ग्रंथदिंडीत सहभागी झालेले विद्यार्थी;  तसेच सहभागी झालेल्या महाविद्यालयांना त्यांच्या ग्रंथालयासाठी पुस्तके खरेदी करण्यासाठी काही कूपन देण्यात येणार आहे. पुणे पुस्तक महोत्सवात सर्वांसाठी प्रवेश मोफत असून, नागरिकांना सकाळी १० ते रात्री १० या कालावधीत आवडत्या पुस्तकांची खरेदी १० टक्के सवलतीच्या दरात करता येईल, असे पांडे यांनी सांगितले.
....
 पुणे पुस्तक महोत्सवाची वैशिष्ट्ये 
....
- पुस्तकांच्या ८०० दालनांमध्ये सर्व भारतीय भाषांची विविध विषयांवर पुस्तके उपलब्ध
- भगवान बिरसा मुंडा यांच्या १५० व्य जयंतीनिमित्त त्यांच्या जीवनावर विशेष दालन
- पुणे पुस्तक महोत्सवाला भेट देणाऱ्या प्रत्येक विद्यार्थ्याला आनंदमठ पुस्तक आणि खाऊ भेट देण्यात येईल.
- नामांकित प्रकाशनाच्या पुस्तकांचे दररोज प्रकाशन
- प्रकशकांकडून चर्चासत्र आणि साहित्यिक कार्यक्रमांचे आयोजन.
- लेखकांसाठी ऑर्थर कॉर्नर 
- चिल्ड्रेन कॉर्नरमध्ये सकाळपासून विविध स्पर्धा, उपक्रम आणि कार्यशाळा
- शनिवारी १३ डिसेंबरपासून दररोज सायंकाळी विनामूल्य सांस्कृतिक कार्यक्रम
- पुणे लिटरेचर फेस्टिव्हल १६ डिसेंबरपासून होणार असून, सकाळी ११ वाजतापासून साहित्यिक संवाद आणि कार्यक्रम

_________________________________________________

वाहतुकीस तात्पुरते बदल

फर्ग्युसन कॉलेज मैदानावर १३ ते २१ डिसेंबर दरम्यान होणाऱ्या पुणे राष्ट्रीय पुस्तक महोत्सवाच्या पार्श्वभूमीवर फर्ग्युसन रस्त्यावरील वाहतुकीत तात्पुरता बदल करण्यात आला आहे. पुणे पुस्तक महोत्सवासाठी व्ही.आय.पी. व्यक्ती, विद्यार्थ्यांबरोबर शहरातील नागरिक मिळून अंदाजे 9 ते 10 लाख जणांची हजेरी अपेक्षित आहे. मोठ्या प्रमाणात गर्दी होणार असल्याने डेक्कन वाहतूक विभागाने वाहतुकीस तात्पुरते बदल करण्याचा निर्णय घेतला आहे. महोत्सव काळात सकाळी नऊपासून रात्री १० वाजेपर्यंत जंगली महाराज रस्ता व फर्ग्युसन कॉलेज रस्त्यावरील वाहतूक कोंडी टाळण्यासाठी आवश्यकतेनुसार वाहतुकीत बदल केला जाईल.
.........
पर्यायी मार्ग:

- जंगली महाराज रोडने कर्वे रोडकडे जाणारे वाहन बालगंधर्वकडे वळून, नदीपात्र रोड व महादेव मंदिर मार्गे इच्छित स्थळी जाईल.

- कर्वे रोडकडून एफ.सी. कॉलेज रोडने शिवाजीनगरकडे जाण्यासाठी कर्वे रोड नळस्टॉप, लॉ कॉलेज रोड व सेनापती बापट रोड मार्गे वाहन नेले जाईल.
.........
पार्किंग व प्रवेश मार्ग:

पुस्तक महोत्सवासाठी येणाऱ्या नागरिकांसाठी एफ.सी. कॉलेज गेट नं. ३ (संत तुकाराम महाराज पादुका चौक) द्वारे दुचाकी, चारचाकी आणि बससह सर्व वाहनांना एफ.सी. कॉलेज पार्किंग ग्राऊंडमध्ये प्रवेश मिळेल.

- बाहेर जाण्यासाठी नागरिकांनी एफ.सी. कॉलेज गेट नं. ४ वापरावे.

- फक्त पायी जाणाऱ्या नागरिकांसाठी एफ.सी. कॉलेज गेट नं. २ खुला राहील.

- बी.एम.सी.सी. कॉलेज तसेच गेट नं. २ समोरील पुणे महापालिका वाहनतळ येथे चारचाकी व दुचाकी वाहनांसाठी विनाशुल्क पार्किंग सुविधा उपलब्ध असेल.
-