यु-डायस प्लस प्रणालीत विद्यार्थी नोंदणीसाठी ३० सप्टेंबरपर्यंत मुदत; शिक्षण विभागाचे शाळांना आदेश
राज्यातील शाळांमध्ये विद्यार्थ्यांची माहिती अद्ययावत करण्याच्या प्रक्रियेला गती देण्यासाठी यु-डायस प्लस प्रणालीमध्ये विद्यार्थी नोंदणी पूर्ण करण्यासाठी ३० सप्टेंबर २०२६ पर्यंत मुदत देण्यात आली आहे. इयत्ता दुसरी ते बारावीपर्यंत अद्याप यु-डायस प्लस प्रणालीमध्ये नोंदणी न झालेल्या विद्यार्थ्यांची माहिती निर्धारित प्रक्रियेनुसार नोंदविण्याच्या सूचना संबंधित यंत्रणांना देण्यात आल्या आहेत.
Eduvarta
एज्युवार्ता न्यूज नेटवर्क
राज्यातील शाळांमध्ये विद्यार्थ्यांची माहिती अद्ययावत करण्याच्या प्रक्रियेला गती देण्यासाठी यु-डायस प्लस (UDISE Plus) प्रणालीमध्ये विद्यार्थी नोंदणी पूर्ण करण्यासाठी ३० सप्टेंबर २०२६ पर्यंत मुदत देण्यात आली आहे. इयत्ता दुसरी ते बारावीपर्यंत अद्याप यु-डायस प्लस प्रणालीमध्ये नोंदणी न झालेल्या विद्यार्थ्यांची माहिती निर्धारित प्रक्रियेनुसार नोंदविण्याच्या सूचना संबंधित यंत्रणांना देण्यात आल्या आहेत.
यासाठी तालुका स्तरावर विद्यार्थ्यांची नोंदणी करण्याची सुविधा उपलब्ध करून देण्यात आली आहे. संबंधित शाळांच्या मुख्याध्यापकांनी नोंदणी न झालेल्या विद्यार्थ्यांची माहिती SO2 प्रपत्राद्वारे उपलब्ध करून देणे आवश्यक आहे. विद्यार्थ्याची यापूर्वी यु-डायस प्लस प्रणालीमध्ये नोंदणी झालेली नाही, याची खात्री करूनच पुढील प्रक्रिया करण्याच्या सूचना देण्यात आल्या आहेत.
तालुका स्तरावर गटशिक्षणाधिकाऱ्यांनी संबंधित विद्यार्थ्यांची माहिती तपासून ती नोंदणीसाठी उपलब्ध करून देण्याची कार्यवाही करावी. त्यानंतर तालुका स्तरावरील MIS समन्वयक किंवा डेटा एन्ट्री ऑपरेटर यांच्या माध्यमातून विद्यार्थ्यांची माहिती यु-डायस प्लस प्रणालीमध्ये नोंदविण्याची प्रक्रिया पूर्ण केली जाणार आहे. त्यामुळे ज्या विद्यार्थ्यांची अद्याप प्रणालीवर नोंद झालेली नाही, अशा विद्यार्थ्यांची माहिती संबंधित शाळांनी वेळेत उपलब्ध करून देणे महत्त्वाचे आहे.
दरम्यान, यु-डायस प्लस प्रणालीतील Dropbox मध्ये असलेल्या विद्यार्थ्यांना त्यांनी प्रवेश घेतलेल्या शाळेत Import करून घेण्याच्या सूचनाही देण्यात आल्या आहेत. Active for Import स्थितीत असलेल्या विद्यार्थ्यांच्या नोंदी पूर्ण करण्यासाठी तालुका किंवा केंद्र स्तरावर आवश्यकतेनुसार विशेष कॅम्प आयोजित करण्याची सूचना करण्यात आली आहे.
विद्यार्थ्यांची नोंदणी प्रक्रिया पूर्ण झाल्यानंतर संबंधित SO2 प्रपत्र तालुका स्तरावर जतन करून ठेवण्याच्या सूचनाही देण्यात आल्या आहेत. त्यामुळे शाळांनी प्रलंबित विद्यार्थ्यांची माहिती तपासून आवश्यक कागदपत्रे व प्रपत्रांची पूर्तता करावी आणि ३० सप्टेंबर २०२६पूर्वी नोंदणीची प्रक्रिया पूर्ण करावी, असे आवाहन करण्यात आले आहे.
