अभियांत्रिकी विद्यार्थ्यांना मोठा दिलासा! प्रवेशासाठी मुदतवाढ देण्याचे उपसभापतींचे आदेश
प्रवेशाची संधी हुकलेल्या विद्यार्थ्यांना मदत करण्यासाठी आणि रिक्त जागा भरण्यासाठी उपाययोजना करण्याबाबत अधिकारी विचार करत असल्याने, महाराष्ट्रातील अभियांत्रिकी प्रवेशाची मुदत वाढवली जाण्याची शक्यता आहे.
Eduvarta
एज्युवार्ता न्यूज नेटवर्क
राज्यातील अभियांत्रिकी अभ्यासक्रमाच्या प्रवेश प्रक्रियेत अद्याप अनेक विद्यार्थी प्रवेशापासून वंचित राहिले आहेत. त्यांच्या शैक्षणिक वर्षाचा अनावश्यक व्यय होऊ नये यासाठी प्रवेशाची मुदत वाढविण्याची मागणी शिवसेना सचिव ॲड. वैभव थोरात यांनी परिषद उपसभापती सचिन अहीर यांच्याकडे निवेदनाद्वारे केली होती. उपसभापती सचिन अहीर यांनी या निवेदनाची तातडीने दखल घेत आयुक्त, राज्य सामायिक प्रवेश परीक्षा कक्षाला त्वरित कार्यवाही करण्याचे स्पष्ट निर्देश दिले आहेत. या निर्णयामुळे प्रवेश न मिळालेल्या विद्यार्थ्यांमध्ये मोठा दिलासा निर्माण झाला आहे आणि त्यांना आणखी एक संधी मिळण्याची आशा निर्माण झाली आहे.
आर्थिक अडचणी, कागदपत्रांची पूर्तता करण्यास लागणारा वेळ तसेच प्रवेश प्रक्रियेतील तांत्रिक अडचणींमुळे अनेक विद्यार्थी शेवटच्या फेरीपर्यंतही प्रवेश घेऊ शकले नाहीत, असे निवेदनात नमूद करण्यात आले होते. उपलब्ध रिक्त जागांचा योग्य उपयोग करून विद्यार्थ्यांचे शैक्षणिक वर्ष वाया जाऊ नये, यासाठी अभियांत्रिकी प्रवेश प्रक्रियेला योग्य मुदतवाढ देण्यात यावी, अशी ठोस मागणी ॲड. थोरात यांनी केली होती. उपसभापतींनी “प्रवेशापासून वंचित राहिलेल्या विद्यार्थ्यांना आणखी एक संधी मिळावी आणि त्यांचे शैक्षणिक वर्ष वाया जाऊ नये” या उद्देशाने केलेल्या विनंतीला तात्काळ प्रतिसाद दिला आणि संबंधित अधिकाऱ्यांना पुढील कारवाईचे आदेश दिले.
राज्यातील अभियांत्रिकी महाविद्यालयांमध्ये विविध १११ अभ्यासक्रमांच्या एकूण २ लाख १६ हजार ५५२ जागा उपलब्ध होत्या. या जागांसाठी यंदा २ लाख ४४ हजार ३५५ विद्यार्थ्यांनी नोंदणी केली होती. मात्र १४ सप्टेंबर रोजी संपलेल्या प्रवेश प्रक्रियेपर्यंत केवळ १ लाख ८१ हजार ९२७ विद्यार्थ्यांनी प्रवेश घेतला. यामध्ये १ लाख १४ हजार १२१ विद्यार्थी आणि ६७ हजार ८०६ विद्यार्थिनींचा समावेश आहे. प्रवेश प्रक्रिया एक दिवस अगोदर संपविल्याने आणि इतर विविध कारणांमुळे अनेक इच्छुक विद्यार्थी प्रवेशापासून बाहेर राहिले आहेत.
या पार्श्वभूमीवर उपसभापतींच्या आदेशाने प्रवेश प्रक्रियेत लवचिकता येण्याची शक्यता निर्माण झाली आहे. रिक्त जागा भरून काढण्यासाठी मुदतवाढ मिळाल्यास हजारो विद्यार्थ्यांना अभियांत्रिकी शिक्षणाची संधी उपलब्ध होईल. शैक्षणिक वर्षाची सुरुवात होण्यापूर्वीच हा निर्णय विद्यार्थ्यांसाठी महत्त्वाचा ठरला आहे. राज्य सामायिक प्रवेश परीक्षा कक्षाकडून आता तातडीने पुढील पावले उचलली जाणे अपेक्षित आहे, ज्यामुळे अधिकाधिक विद्यार्थी आपले भवितव्य घडवू शकतील.
