शिक्षक निवडणूकीत भाजपचा एकला चलो रे चा नारा..? मतदारांची पसंती कोणाला? २३ ऑक्टोबरला मतदान

एज्युवार्ता न्यूज नेटवर्क 

केंद्रीय निवडणूक आयोगाने शिक्षक व पदवीधर निवडणूकीचा कार्यक्रम जाहीर केला असून आता निवडणूक लढण्यास इच्छुक असणारे उमेदवारही अधिक जोमाने कामाला लागले आहेत.त्यातच आता राजकीय नेतेही जागा वाटपाबाबत आणि एकत्रित किंवा स्वतंत्र निवडणूक लढण्याबाबत भाष्य करताना दिसत आहेत.महायुती म्हणून किंवा वेळप्रसंगी पुणे शिक्षक व पदवीधर मतदार संघात दोन्ही जागा स्वतंत्रपणे लढण्याची तयारी असल्याचे भाजप नेते जायकुमार गोरे सांगत आहेत. तर जागा वाटपाचा फॉर्म्युला ठरल्यानंतर उमेदवार निश्चितीबाबत निर्णय घेतला जाईल,असे राष्ट्रवादी काँग्रेस पक्षाचे नेते हसन मुश्रीफ सांगत आहेत.ठराविक पक्षाकडून तिकीट मिळण्यासाठी काही उमेदवार प्रयत्नशील असल्याचे दिसून येत आहे.

शिक्षक व पदवीधर निवडणूकीचे बिगुल वाजले असून पुणे शिक्षक मतदार संघातून  विद्यमान आमदार जयंत आसगावकर, वाडिया कॉलेजचे प्राध्यापक व मॉडर्न एज्युकेशन सोसायटीचे विस्वस्त सचिन सानप, टीडीएफ पुरस्कृत आणि कोल्हापूर येथील स्वामी विवेकानंद शिक्षण संस्थेचे मुख्य कार्यकारी अधिकारी कौस्तुभ गावडे,आरोग्य दूत मंगेश चिवटे यांच्यासह माजी आमदार दत्ता सावंत आणि शिक्षक संघटनेचे नेते नंदकूमार सागर उमेदवार शिक्षक मतदार संघातून निवडणूक लढण्यास इच्छुक आहेत.सोलापूर जिल्ह्यातूनही काही उमेदवार आपले नशीब आजमावण्याचा प्रयत्न करत आहेत. मात्र,अद्याप कोणालाही उमेदवारी जाहीर झालेली नाही.त्यामुळे सर्व उमेदवारांनी स्वत:च्या पातळीवर मतदार नोंदणीचे काम केले असले तरी पक्षातर्फे उमेदवारी कोणाला मिळणार यावरही बरेच काही अवलंबून आहे. 

मागील पडवीधर व शिक्षक निवडणूकीत भारतीय जनता पक्षाला पराभवाचा सामना करावा लागला. पदवीधरमधून राष्ट्रवादी काँग्रेसचे अरूण लाड तर शिक्षक मतदार संघातून काँग्रेसचे जयंत आसगावकर निवडून आले. भाजपला त्यामुळेच या पराभवाचा वचपा काढायचा आहे.त्यामुळे जायकुमार गोरे यांनी वेळ प्रसंगी स्वतंत्र निवडणूक लढवण्याची तयारी दर्शवली आहे.मात्र, सध्या समीकरणे बदलली आहेत. शिवसेना शिंदे गट आणि राष्ट्रवादी कॉग्रेस अजित पवार गट यांच्याकडूनही जागा आपल्या पक्षाला मिळावी,अशी भूमिका घेतली जाणार आहे. त्यामुळे पदवीधरची जागा भाजपला मिळाली तर शिक्षक मतदार संघाची जागा शिवसेना शिंदे गटाला मिळू शकते,अशी चर्चा राजकीय वर्तुळात आहे. त्यामुळेच प्रा. सचिन सनप यांनी निवडणूक लढवण्याची तयारी केली असावी, अशी शक्यता वर्तवली जात आहे.त्याचप्रमाणे सानप हे  "शिक्षकांचा उमेदवार शिक्षक असावा" ही टॅग लाईन घेऊन ते प्रचार करत असल्याने पुणे जिल्ह्यात त्यांचे पारडे जड असल्याचे दिसून येत आहे. इच्छुक उमेदवारांपैकी काही उमेदवार शिक्षक नाहीत, त्यामुळे शिक्षक मतदार अशा उमेदवारांना पसंती देणार का? असा प्रश्न निर्माण होणार आहे.

कौस्तुभ गावडे यांना उच्च व तंत्र शिक्षण मंत्री चंद्रकांत पाटील यांचा पाठिंबा असल्याचे बोलले जात आहे. तर मंगेश चिवटे यांच्या उमेदवारीसाठी प्रयत्न करणार असल्याचे शिवसेनेचे आमदार जाहीरपणे सांगत आहेत.दत्ता सावंत यांनी जयकुमार गोरे यांच्याकडे तिकीट मिळण्यासाठी जवळीक साधली असल्याची चर्चा आहे.काँग्रेस पक्षाकडून तिकीट मिळावे यासाठी आसगावकर यांच्यासह इतरही उमेदवार प्रयत्नशील आहेत.त्यामुळे सर्वच उमेदवार जोरदार तयारी करत असल्याचे दिसून येत आहे.  

दरम्यान, येत्या २९ सप्टेंबरपासून शिक्षक मतदार संघात उमेदवारी अर्ज दाखल करण्यास सुरुवात होईल. उमेदवारी अर्ज दाखल करण्याची शेवटची तारीख ६ ऑक्टोबर तारीख आहे. तर २३ ऑक्टोबर रोजी मतदान होणार असून २७ ऑक्टोबरला मतमोजणी होणार आहे.