एसटी महामंडळात मेगा भरती! १७ हजार ७४२ पदांच्या भरतीची घोषणा

एज्युवार्ता न्यूज नेटवर्क 

सरकारी नोकरीच्या शोधात असलेल्या तरूणांसाठी महत्त्वाची बातमी समोर आली आहे. महाराष्ट्र राज्य मार्ग परिवहन महामंडळात (State Road Transport Corporation) लवकरच मोठी मेगाभरती (Mega recruitment) होणार आहे. एसटी महामंडळामध्ये १७ हजार ७४२ पदांची (17 thousand 742 posts) मेगा भरती करण्यात येणार असल्याची अधिकृत घोषणा राज्याचे परिवहन मंत्री प्रताप सरनाईक (Minister Pratap Sarnaik) यांनी केली आहे. एसटी महामंडळ अधिक सक्षम आणि आधुनिक करण्यासाठी दरवर्षी पाच हजार नवीन बस खरेदी करण्याचे धोरण राबवले जात आहे. या नव्या बस सेवेसाठी आवश्यक मनुष्यबळ उपलब्ध व्हावे यासाठी नवीन कर्मचाऱ्यांची भरतीही कंत्राटी (Contractual recruitment) पद्धतीने करण्यात येणार, असल्याची माहिती सरनाईक यांनी विधानपरिषदेत दिली. 

आर्थिक संकटातून सावरण्याचा प्रयत्न करणाऱ्या महाराष्ट्र राज्य मार्ग परिवहन महामंडळाला बळकटी देण्यासाठी राज्य सरकारने मोठा निर्णय घेतला आहे. महामंडळाच्या ताफ्यात वाढणाऱ्या बसेसच्या तुलनेत मनुष्यबळाची भासणारी कमतरता दूर करण्यासाठी लवकरच १७ हजार ७४२ पदांची मेगा भरती केली जाणार आहे. या निर्णयामुळे राज्यातील सुशिक्षित बेरोजगार तरुणांना रोजगाराची मोठी संधी उपलब्ध होणार आहे.

​एसटी महामंडळाची सेवा अधिक विस्तारण्यासाठी आणि प्रवाशांना दर्जेदार सुविधा देण्यासाठी रिक्त पदे भरण्याची प्रक्रिया अनिवार्य झाली आहे. परिवहन विभागाने या भरतीचा प्रस्ताव वित्त विभागाकडे मंजुरीसाठी पाठवला असून, तांत्रिक प्रक्रिया पूर्ण होताच जाहिरात प्रसिद्ध केली जाईल, अशी माहिती मंत्र्यांनी दिली. विशेष म्हणजे, २०२२ मध्ये ज्या कंत्राटी कर्मचाऱ्यांनी सेवा बजावली, त्यांना या भरती प्रक्रियेत विशेष प्राधान्य दिले जाणार आहे. त्यांच्या अनुभवाचा विचार करून त्यांना शासकीय सेवेत सामावून घेण्याकडे सरकारचा कल असल्याचे दिसून येत आहे.