शाळेच्या तिसऱ्या मजल्यावरून उडी मारून विद्यार्थिनीची आत्महत्या

एज्युवार्ता न्यूज नेटवर्क 

जालना (jalana)येथे इयत्ता आठवी शिकणाऱ्या 13 वर्षीय विद्यार्थिनीने शाळेच्या इमारतीच्या तिसऱ्या मजल्यावरून उडी मारून आत्महत्या (Student suicide)केल्याची धक्कादायक माहिती समोर आली आहे. गेल्या काही दिवसांपासून देशभरात दिल्लीसह अनेक ठिकाणाहून विद्यार्थ्यांच्या आत्महत्येच्या घटना समोर येत आहे. त्यात जालना येथे विद्यार्थिनीने आत्महत्या केल्यामुळे परिसरात शोककळा पसरली आहे.

आरोही दीपक बिडलान असे मृत विद्यार्थिनींचे नाव आहे. नेहमीप्रमाणे आरोही शुक्रवारी शाळेत गेली. प्रार्थना झाल्यानंतर सर्व विद्यार्थी आपापल्या वर्गात गेले. मात्र आरोही थेट शाळेच्या इमारतीच्या तिसऱ्या मजल्यावर गेली आणि तेथून तिने उडी मारून आत्महत्या केली. शिक्षकांना ही घटना समजताच त्यांनी तेथे धाव घेऊन आरोहीला तात्काळ रुग्णालयात दाखल केले. परंतु उपचार सुरू होण्यापूर्वीच आरोहीचा मृत्यू झाला होता. पोलीस याबाबत तपास करत असून शिक्षक व मुख्याध्यापकांची चौकशी सुरू आहे.

दरम्यान, आरोहीचे वडील यांनी याबाबत शिक्षकांविरोधात तक्रार केली आहे. काही दिवसांपूर्वी शाळेतील काही विद्यार्थी आरोहीला त्रास देत होते. याबाबत आरोहीने शिक्षकांकडे तक्रार केली होती. मात्र शिक्षकांनी तिच्या तक्रारीकडे दुर्लक्ष केल्यामुळेच आरोहीने आत्महत्येचे पाऊल उचलले, असा आरोप आरोहीच्या पालकांकडून करण्यात आला आहे.मात्र, शाळेच्या मुख्याध्यापकांनी सर्व आरोप फेटाळले आहेत.