धक्कादायक! SRPF मैदानी चाचणी दरम्यान विद्यार्थ्यांनी केले शक्तीवर्धक गोळ्यांचे सेवन

एज्युवार्त न्यूज नेटवर्क 

दौंड येथे  राज्य राखीव पोलिस दल (SRPF Recruitment) मैदानी चाचणी दरम्यान धक्कादायक प्रकार समोर आला आहे. मैदानी चाचणी (Ground Test) दरम्यान उमेदवारांच्या हावभावावरून प्रशासनाला संशय निर्माण झाला. त्यानंतर तीन उमेदवारांची वैद्यकीय तपासणी करण्यात आली, यावेळी तीनही उमेदवारांची शक्तीवर्धक औषधांचे सेवन (Consumption of strength-enhancing medicines) केल्याचे आढळून आले. अधिकाऱ्यांनी त्यांच्या बागेची झडती घेतल्यानंतर त्यांच्याकडे शक्तीवर्धक पावडर आणि गोळ्या सापडल्या, त्यानंतर तीन विद्यार्थ्यावर कारवाई (Action Taken Against 3 Candidate) करण्यात आल्याची माहिती देण्यात आली आहे.  

एसआरपीएफ गट क्रमांक पाच येथे सशस्त्र पोलिस शिपाई पदाच्या १०४ जागांसाठी भरती सुरू आहे. मैदानी चाचणीदरम्यान तीन तरुणांकडे संशयास्पद पदार्थ आढळले. धावण्याच्या स्पर्धेत सरस कामगिरी करण्यासाठी त्यांनी हे सेवन केल्याचा संशय अधिकाऱ्यांनी व्यक्त केला. संबंधित उमेदवारांनी मात्र ही केवळ 'प्रोटिन पावडर' असल्याचा दावा केला आहे.

दौंड पोलिस ठाण्याचे निरीक्षक गोपाळ पवार यांनी सांगितले की, उमेदवारांच्या रक्ताचे नमुने आणि जप्त केलेले पदार्थ प्रयोगशाळेत तपासणीसाठी पाठवले आहेत. सध्या कोणताही गुन्हा दाखल नसून, प्रयोगशाळेचा अहवाल प्राप्त झाल्यानंतर पुढील कायदेशीर कारवाई केली जाईल. १०४ जागांच्या या भरतीसाठी २४ हजार ४३६ उमेदवारांनी अर्ज केले, यासाठी मैदानी चाचणी घेतली जात आहे.

उमेदवारांना प्रवेशद्वारावरच कुठल्याही प्रकारचे मादक पदार्थ किंवा शरीराला उत्तेजित करणाऱ्या पदार्थाचे सेवन आपण करू नये, अशा सूचना दिल्या जातात. तरी देखील काही उमेदवारांनी कागदपत्र तपासल्यानंतर शरीराला अतिउत्तेजित करणारी पावडर, आणि काही गोळ्यांचा वापर करण्याचा प्रयत्न केला आहे. सातारा आणि सांगली मधील हे उमेदवार असून एकूण तीन जणांवर उमेदवारांवर करवाई करण्यात आल्याची माहिती अधिकाऱ्यांनी दिली आहे.