सेंद्रिय शेती अभ्यासक्रमातून विषमुक्त शेतीकडे वाटचाल

एज्युवार्ता न्यूज नेटवर्क 

डॉ. पंजाबराव देशमुख कृषी विद्यापीठात (Dr. Punjabrao Deshmukh Agricultural University) इकोसर्ट (फ्रान्स), कॉटन कनेक्ट (यूके) या संस्थाच्यावतीने देशातील पहिला सेंद्रिय शेती व्यवस्थापन पद्धती व प्रमाणीकरण पदव्युत्तर पदविका अभ्यासक्रम (Postgraduate Diploma Courses) सुरू करण्यात आला आहे. गतवर्षी सुरू करण्यात आलेला हा अभ्यासक्रम यावर्षी पूर्ण करून पदविका घेतलेल्या विद्याथ्यर्थ्यांनी विषमुक्त शेती, पीक उत्पादनाचे प्रयत्न सुरू केले आहेत. 

विषमुक्त अन्नधान्य उत्पादनासाठी डॉ. पंजाबराव देशमुख कृषी विद्यापीठात या अगोदर २०२२ मध्ये सेंद्रिय शेती प्रमाणपत्र अभ्यासक्रम सुरू करण्यात आला होता. शेतकरी, विद्यार्थ्यांनी येथून सेंद्रिय अभ्यासक्रमाचे प्रमाणपत्र घेऊन सेंद्रिय शेती सुरू केली आहे. परंतु, यामध्ये विद्यार्थ्यांना सेंद्रिय शेतीची अद्ययावत तंत्रज्ञानाची माहिती उपलब्ध व्हावी, याकरिता डॉ. पंजाबराव देशमुख कृषी विद्यापीठ व सेंद्रिय शेतीत काम करणारी फ्रान्स येथील इकोसर्ट आणि युकेमधील कॉटन कनेक्ट संस्था मिळून अकोल्यातील या कृषी विद्यापीठात पदव्युत्तर पदविका सेंद्रिय शेती अभ्यासक्रम मागच्या वर्षापासून सुरू करण्यात आला असून, २६ विद्यार्थ्यांची तुकडी अभ्यासक्रम पूर्ण करून यावर्षी बाहेर पडली असून, काही सेंद्रिय कृषी उद्योग सुरू केला आहे, तर काहींनी सेंद्रिय शेती व कंपन्यांमध्ये नोकरी मिळविली आहे.

कृषी विद्यापीठे, भारतीय कृषी संशोधन परिषदअंतर्गत व नामवंत सामाजिक संस्था, प्रगतशील शेतकरी, शेती प्रमाणीकरण, शेतकरी उत्पादक कंपन्यांचे तज्ज्ञ या विद्यार्थ्यांना सेंद्रिय शेती कशी व प्रमाणीकरण कसे याबाबतची माहिती देत आहेत, सेंद्रिय शेतीसह सेंद्रिय निविष्ठा उत्पादक कंपन्यांच्या सहली केल्या जात आहेत.