TET पेपर फुटीच्या निषेधार्थ शिक्षण मंत्री दादा भुसे यांनी राजीनामा द्यावा; SFI विद्यार्थी संघटनेची मागणी
eduvarta@gmail.com 
एज्युवार्ता न्यूज नेटवर्क
महाराष्ट्र राज्य परीक्षा परिषद आणि राज्याच्या शालेय शिक्षण मंत्रालयाच्या अक्षम्य ढिसाळ कारभारामुळे टीईटी परीक्षेचा पेपर फुटला. त्यामुळे या प्रकरणाची संपूर्ण जबाबदारी स्वीकारून शालेय शिक्षण मंत्री दादा भुसे यांनी तातडीने राजीनामा द्यावा.तसेच पेपर फुटीची उच्चस्तरीय व निष्पक्ष चौकशी व्हावी, MH TET सह सर्व शासकीय परीक्षांचे काम खाजगी कंपन्यांना देणे कायमचे बंद करावे, या मागणीसाठी स्टुडंट फेडरेशन ऑफ इंडिया अर्थात एसएफआयतर्फे राज्य परीक्षा परिषदेच्या कार्यालयासमोर सोमवारी आंदोलन करण्यात आले. विद्यार्थ्यांनी सरकार विरोधात जोरदार घोषणा दिल्या.
राज्य परीक्षा परिषदेतर्फे घेतला जाणारा टीईटी परीक्षेचा पेपर फुटल्यामुळे परीक्षा रद्द करण्याची नामुष्की शिक्षण विभागावर आली. तब्बल 6 लाख उमेदवारांच्या भविष्याशी खेळ खेळला गेला. भिवंडी येथून तिघांना ताब्यात घेतले. पेपर गोपनीय प्रिंटिंग प्रेसमधून फुटला असल्याची शक्यता व्यक्त केली जात आहे. केंद्र व राज्य शासनाला एकही परीक्षा पारदर्शक पद्धतीने घेता येत नसल्याचे सिद्ध झाले.परंतु, ही जबाबदारी स्वीकारण्यास कोणीही तयार नाही.मात्र, पेपर फुटीची जबाबदारी स्वीकारून शिक्षण मंत्री दादा भुसे यांनी तातडीने राजीनामा द्यावा, अशी मागणी करण्यात आली.
शिक्षण मंत्री होश मे आयो, भाजप सरकार होश मे आयो, टीईटी पेपर फुटीचा धिक्कार असो, पेपर फुटीला जबाबदार असणाऱ्या दोषींना शिक्षा झालीच पाहिजे, अशा घोषणा यावेळी देण्यात आल्या.
अनेक परीक्षांमध्ये घोटाळे करणारे NTA बरखास्त केले पाहिजे. शिक्षणाचे खासगीकरण आणि बाजारीकरण करणारे राष्ट्रीय शैक्षणिक धोरण रद्द करा. रोजगाराचा अधिकार हा मूलभूत अधिकार झाला पाहिजे आणि शासनाने सर्वांना रोजगार देण्याची जबाबदारी स्वीकारली पाहिजे, अशी मागणी यावेळी निवेदनाद्वारे करण्यात आली.
