पीएच. डी. च्या राज्यभर पेटलेल्या दिव्यावर फुंकर ; अजित पवारांची दिलगिरी
पीएचडीबाबत मी जे बोललो त्याचा विपर्यास करण्यात आला. त्याबाबत मी दिलगिरी व्यक्त करतो.
eduvarta@gmail.com 
एज्युवार्ता न्यूज नेटवर्क
'पीएच.डी. (Ph.d.) करून काय दिवा काय लावणार आहे 'या अजित पवार (Ajit Pawar ) यांनी केलेल्या वक्यतव्यांचा राज्यातील संशोधक विद्यार्थ्यांनी निषेध केला. समाज माध्यमांवर अजित पवार यांना ट्रोल करण्यात आले. राज्यातील काही विद्यापीठांमध्ये रॅली काढण्यात आली. राज्यभरातून टीकेची झोड उठल्यानंतर अजित पवार यांनी माझ्या व्यक्तव्याचा विपर्यास करण्यात आला. मी त्याबाबत दिलगिरी व्यक्त करतो,असे म्हणत पीएच.डी.च्या दिव्यावर फुंकर मारून विषय संपवला.
गुरुवारी विधान भवन परिसरात प्रसारमाध्यमांशी संवाद साधताना अजित पवार यांनी आपल्या वक्तव्याबाबत दिलगिरी व्यक्त केली. पीएचडीबाबत मी जे बोललो त्याचा विपर्यास करण्यात आला. त्याबाबत मी दिलगिरी व्यक्त करतो. मात्र, काही संशोधक हे नेत्यांवर पीएचडी करताहेत, असे होऊ नये. पीएचडी करताना विषयाचे गांभीर्य असायला हवे,असेही अजित पवार म्हणाले.
पवार यांनी दिलगिरी व्यक्त केल्यामुळे संशोधक विद्यार्थ्यांचे निषेध आंदोलन एक वेळ बंद होईल.मात्र,सारथी, बार्टी, महाज्योती आदी संस्थांमध्ये पीएच.डी. फेलोशीपसाठी अर्ज केल्या विद्यार्थ्यांना सरसकट फेलोशीप मिळाल्याशिवाय हा विषय संपणार नाही,असे आंदोलन विद्यार्थ्यांकडून सांगितले जात आहे.
