दोन चिमुकल्या बहिणींचा विहिरीत पडून दुर्दैवी मृत्यू; बापाच्या देखतच हृदयद्रावक घटना
वर्धा जिल्ह्यातील सेलूजवळील एका शेतातील विहिरीत पडून दोन बहिणींचा मृत्यू झाला. २३ सप्टेंबर रोजी घडलेल्या या घटनेच्या परिस्थितीचा पोलीस तपास करत आहेत.
Eduvarta
एज्युवार्ता न्यूज नेटवर्क
वर्धा जिल्ह्यातील सेलू शहरात बुधवारी एक अत्यंत हृदयदावक घटना घडली. गुड शेफर्ड आणि स्कुल ऑफ ब्रिलियंटमध्ये शिकणाऱ्या छोटी बहिणी दिव्या सचिन साटोने (वय ८) आणि उन्नती सचिन साटोने (वय १०) यांचा विहिरीत पडून मृत्यू झाला. या घटनेने संपूर्ण सेलू परिसरात शोककळा पसरली असून पालकांची मुलींबाबतची अपेक्षा आणि चिमुकल्यांच्या निमूट स्वभावाची आठवण करून देणारी ही घटना सर्वांना हादरवून गेली आहे.
पालक सचिन साटोने यांनी मध्येच शाळेतून मुलींना गावी जाण्याच्या बहाण्याने सुटी मागितली आणि त्यांना कोलगाव शिवारातील शेतात नेले. काही वेळातच दोघी विहिरीत पडल्याचे दिसून आले. पाणी पिण्यासाठी गेल्या असता पाय घसरून पडल्याचे सांगितले जात असले तरी यामागे काही वेगळे कारण असू शकते, अशी चर्चा परिसरात सुरू आहे. पालकाने विहिरीत उडी मारून मुलींना वाचविण्याचा प्रयत्न केल्याचेही सांगितले जाते. शिवारातील नागरिकांनी तातडीने धाव घेतली आणि पोलिसांना घटनास्थळी बोलावले.
सेलूतील धान्य मार्केटसमोर राहणाऱ्या साटोने कुटुंबावर हा प्रसंग ओढवला आहे. सचिन साटोने यांना तीन मुली असून मोठी मुलगी देवयानी स्कुल ऑफ ब्रिलियंटमध्ये सहावीत शिकते. ती गावातील गणपती कार्यक्रमात जेवणासाठी गेली असल्याने ती वाचली. दोन्ही मुलींचे मृतदेह नागरिकांच्या मदतीने विहिरीतून बाहेर काढण्यात आले आणि सेलू ग्रामीण रुग्णालयात उत्तरीय तपासणीसाठी पाठविण्यात आले.
या घटनेची नोंद घेण्यात आली असून सेलू पोलीस पुढील तपास करीत आहेत. नेमकी परिस्थिती आणि इतर तपशील तपासानंतर स्पष्ट होणार आहेत. एकाच कुटुंबातील दोन चिमुकल्या बहिणींचा एकाच दिवशी मृत्यू झाल्याने सेलू परिसरात तीव्र हळहळ व्यक्त होत आहे. मुलींनी बापाचे ऐकून काम केले आणि आजचा दिवस त्यांच्यासाठी जीवघेणा ठरला, असे स्थानिकांचे म्हणणे आहे.
