MBBS च्या २ हजार रिक्त जागांवर प्रवेशाची संधी; आजपासून अर्ज प्रक्रिया सुरू
नीट यूजी २०२६ उत्तीर्ण झालेल्या पण अद्याप एमबीबीएस प्रवेश न मिळालेल्या विद्यार्थ्यांसाठी मोठी दिलासादायक बातमी आहे. देशभरातील वैद्यकीय महाविद्यालयांमध्ये सुमारे दोन हजार जागा अजूनही रिक्त आहेत. या जागा भरण्यासाठी मेडिकल कौन्सिलिंग कमिटी (एमसीसी) ने विशेष ‘स्पेशल स्ट्रे व्हॅकन्सी राउंड’ जाहीर केला आहे.
Eduvarta
एज्युवार्ता न्यूज नेटवर्क
नीट यूजी २०२६ उत्तीर्ण झालेल्या पण अद्याप एमबीबीएस प्रवेश न मिळालेल्या विद्यार्थ्यांसाठी मोठी दिलासादायक बातमी आहे. देशभरातील वैद्यकीय महाविद्यालयांमध्ये सुमारे दोन हजार जागा अजूनही रिक्त आहेत. या जागा भरण्यासाठी मेडिकल कौन्सिलिंग कमिटी (एमसीसी) ने विशेष ‘स्पेशल स्ट्रे व्हॅकन्सी राउंड’ जाहीर केला आहे. राष्ट्रीय वैद्यकीय आयोगाच्या परवानगीने हा राउंड राबवला जात असून, इच्छुक उमेदवारांना २ नोव्हेंबर २०२६ पासून ऑनलाइन अर्ज करण्याची अंतिम संधी मिळाली आहे. या संधीचा लाभ घेऊन अनेक विद्यार्थी आपले वैद्यकीय शिक्षण सुरू करू शकतील.
राज्यातील प्रवेश प्रक्रिया पूर्ण झाल्यानंतरही कर्नाटक, तेलंगणा, पश्चिम बंगाल, राजस्थान या राज्यांतील महाविद्यालयांसह काही डीम्ड विद्यापीठांमध्ये जागा रिक्त राहिल्या आहेत. प्रामुख्याने खाजगी महाविद्यालयांमधील उच्च फीमुळे अनेक विद्यार्थ्यांनी प्रवेश टाळला, तर काही शासकीय महाविद्यालयांमध्येही मर्यादित जागा उपलब्ध आहेत. या पार्श्वभूमीवर एमसीसीने सर्व रिक्त जागा भरण्यासाठी हा विशेष राउंड आयोजित केला आहे. विद्यार्थ्यांनी वेळेवर अर्ज करून आपली पसंती नोंदवणे आवश्यक आहे.
प्रवेश प्रक्रियेचे वेळापत्रक अत्यंत महत्त्वाचे आहे. ऑनलाइन नोंदणी २ नोव्हेंबरपासून सुरू होऊन ४ नोव्हेंबर दुपारी ३ वाजेपर्यंत पूर्ण करावी लागेल. अर्ज शुल्क ४ नोव्हेंबर संध्याकाळी ६ वाजेपर्यंत भरता येईल. चॉईस फिलिंग २ ते ५ नोव्हेंबरपर्यंत सुरू राहील, तर चॉईस लॉक ४ नोव्हेंबर संध्याकाळी ४ वाजता सुरू होऊन ५ नोव्हेंबर सकाळी ११ वाजेपर्यंत पूर्ण होईल. सीट अलॉटमेंटचा निकाल ७ नोव्हेंबरला जाहीर होईल आणि रिपोर्टिंगची मुदत ७ ते १६ नोव्हेंबर संध्याकाळी ५ वाजेपर्यंत असेल.
विद्यार्थ्यांनी नोंदणी आणि फी भरण्याच्या वेगवेगळ्या अंतिम वेळा लक्षात ठेवून दोन्ही प्रक्रिया वेळेत पूर्ण करणे बंधनकारक आहे. यशस्वी विद्यार्थ्यांनी निर्धारित मुदतीत संबंधित महाविद्यालयात हजर होऊन प्रवेश प्रक्रिया पूर्ण करावी. ही अंतिम संधी असल्याने इच्छुकांनी अधिकृत वेबसाइटवर लवकरात लवकर अर्ज करावा आणि सर्व नियम काळजीपूर्वक पाळावेत, असे आवाहन करण्यात आले आहे.
