दुष्काळग्रस्त विद्यार्थ्यांचे दहावी-बारावी परीक्षा शुल्क माफ करा; युवक काँग्रेसची आक्रमक मागणी
महाराष्ट्र युवक काँग्रेसने दुष्काळ आणि आपत्तीग्रस्त कुटुंबांतील विद्यार्थ्यांसाठी एसएससी एचएससी परीक्षा शुल्क माफ करण्याची, तसेच आधीच भरलेले शुल्क परत करण्याची मागणी केली आहे.
Eduvarta
एज्युवार्ता न्यूज नेटवर्क
महाराष्ट्र प्रदेश युवक काँग्रेसचे अध्यक्ष शिवराज मोरे यांनी राज्यातील दुष्काळ आणि नैसर्गिक आपत्तीमुळे आर्थिक संकटात सापडलेल्या कुटुंबांतील दहावी व बारावीच्या विद्यार्थ्यांचे परीक्षा शुल्क पूर्णपणे माफ करण्याची मागणी केली आहे. त्याचबरोबर ज्या विद्यार्थ्यांनी आधीच शुल्क भरले आहे, त्यांना ते परत करण्याचीही विनंती त्यांनी केली. ही मागणी शिक्षण मंडळाच्या सचिव मीनाक्षी राऊत यांना निवेदन देऊन करण्यात आली. राज्यातील अनेक कुटुंबे सध्या आर्थिक अडचणींचा सामना करत असल्याने विद्यार्थ्यांच्या शिक्षणावर त्याचा विपरीत परिणाम होऊ नये, यासाठी तातडीने निर्णय घेण्याची आवश्यकता शिष्टमंडळाने व्यक्त केली.
या भेटीदरम्यान परीक्षा शुल्काबाबत सविस्तर चर्चा झाली. मंडळाच्या अधिकाऱ्यांनी या विषयावर राज्य परीक्षा मंडळाशी चर्चा करून योग्य तो निर्णय घेण्याबाबत विचार करण्यात येईल, असे आश्वासन दिले. दुष्काळी आणि संकटग्रस्त भागातील कुटुंबांना आर्थिक मदत मिळावी आणि विद्यार्थ्यांना शिक्षणात कोणताही अडथळा येऊ नये, हेच या मागणीमागील मुख्य उद्देश असल्याचे स्पष्ट करण्यात आले.
शिवराज मोरे यांनी यावेळी सांगितले की, राज्यात जेव्हा जेव्हा दुष्काळ किंवा गंभीर नैसर्गिक संकट निर्माण झाले, तेव्हा शासनाने विद्यार्थ्यांना दिलासा देण्यासाठी विविध निर्णय घेतले आहेत. आजही अनेक कुटुंबे आर्थिक अडचणीत आहेत. अशा परिस्थितीत दहावी-बारावीच्या विद्यार्थ्यांवर परीक्षा शुल्काचा अतिरिक्त भार टाकणे योग्य ठरणार नाही. म्हणूनच परीक्षा शुल्क तातडीने माफ करावे आणि भरलेले शुल्क परत करावे, अशी ठाम मागणी त्यांनी केली.
शिष्टमंडळाने आर्थिक अडचणींमुळे एकाही विद्यार्थ्याच्या शिक्षणात अडथळा येऊ नये, यासाठी तातडीने निर्णय घेऊन विद्यार्थ्यांना दिलासा देण्याचे आवाहन केले. राज्यातील दुष्काळग्रस्त विद्यार्थ्यांच्या भविष्यासाठी ही मागणी अत्यंत महत्त्वाची असल्याचे मत युवक काँग्रेसने व्यक्त केले आहे. शिक्षण मंडळाने याबाबत लवकरात लवकर सकारात्मक पावले उचलतील, अशी आशा व्यक्त करण्यात आली.
