'सीटीईटी' परीक्षा पुन्हा लांबणीवर! उमेदवारांची धाकधूक वाढली; नव्याने अर्ज प्रक्रिया सुरू
महाराष्ट्र TET ला विलंब झाल्यानंतर आता ६ सप्टेंबरला होणारी CTET परीक्षाही पुढे ढकलण्यात आली आहे, ज्यामुळे शिक्षकांच्या चिंतेत भर पडली आहे. परीक्षेबाबतची अद्ययावत माहिती आणि महत्त्वाचे तपशील जाणून घ्या.
Eduvarta
एज्युवार्ता न्यूज नेटवर्क
राज्याची जून महिन्यात होणारी टीईटी परीक्षा पेपर फुटीनंतर लांबणीवर गेली असताना आता केंद्रीय शिक्षक पात्रता परीक्षा म्हणजेच सीटीईटीही पुढे ढकलण्यात आली आहे. ६ सप्टेंबरला होणारी ही परीक्षा सीबीएसईने स्थगित केली आहे. त्यामुळे राज्यातील हजारो शिक्षकांमध्ये मोठी अस्वस्थता निर्माण झाली आहे. परीक्षा नेमकी कधी घेतल्या जातील, याबाबत अद्याप स्पष्टता नसल्याने उमेदवारांची धाकधूक वाढली आहे.
सीबीएसईने सीटीईटी पुढे ढकलण्यामागे व्यापक दृष्टिकोन असल्याचे सांगितले आहे. अनेक शिक्षकांना नोंदणीची संधी मिळाली नव्हती. त्यांना पुन्हा नोंदणी करता यावी, यासाठी हा निर्णय घेण्यात आला आहे. मात्र, गेल्या अनेक महिन्यांपासून राज्याची टीईटी आणि केंद्रीय सीटीईटी दोन्हींची तयारी करत असलेल्या शिक्षकांना यामुळे मनस्ताप सहन करावा लागत आहे. अभ्यासक्रम पूर्ण केलेल्या उमेदवारांना पुन्हा अनिश्चिततेचा सामना करावा लागत आहे.
शालेय शिक्षकांवर दुहेरी ताण आहे. दिवसभर पाच ते सहा तास शाळेत विद्यार्थ्यांना शिकवावे लागते आणि शाळा संपल्यानंतर टीईटीचा अभ्यास करावा लागतो. सर्वोच्च न्यायालयाच्या निर्णयानुसार टीईटी उत्तीर्ण होणे बंधनकारक झाले असून नोकरी टिकवण्यासाठी ही परीक्षा आवश्यक आहे. सरकारकडूनही परीक्षा द्यावीच लागेल, असे सांगण्यात येत आहे. मात्र परीक्षा कधी होणार, याचे उत्तर अद्याप मिळालेले नाही. त्यामुळे शिक्षकांमध्ये संभ्रम आणि चिंता वाढली आहे.
२८ जूनला होणारी राज्याची टीईटी परीक्षा पेपर फुटीनंतर रद्द झाली. दोन महिने उलटून गेले तरी शालेय शिक्षण विभागाने नवी तारीख जाहीर केलेली नाही. दरम्यान सीटीईटी हा पर्याय उपलब्ध होईल, अशी आशा होती. पण तीही पुढे ढकलल्याने शिक्षकांची चिंता आणखी वाढली आहे. नोंदणी न केलेल्यांना संधी मिळाली तरी तयारीत असलेल्यांना पुन्हा प्रतीक्षा करावी लागणार आहे. दोन्ही परीक्षा कधी होतील, याबाबत लवकरच स्पष्टता यावी, अशी अपेक्षा शिक्षकांकडून व्यक्त केली जात आहे.
