स्वयंअर्थसहाय्यित विद्यापीठांमध्ये मराठी भाषा विभाग अनिवार्य; मंत्री चंद्रकांत पाटील यांचे निर्देश
NAAC, NBA मानांकन आणि NIRF रँकिंगमध्ये सहभाग वाढवण्यासाठी ठोस उपाययोजना कराव्यात. चार वर्षांचा पदवी अभ्यासक्रम, इंटर्नशिपची अंमलबजावणी आणि AISHE पोर्टलवर माहिती नोंदवणे अनिवार्य.
Eduvarta
0
एज्युवार्ता न्यूज नेटवर्क
राज्यातील सर्व स्वयंअर्थसहाय्यित (Self-Financed) विद्यापीठांमध्ये मराठी भाषा विभागाची स्थापना करण्याचे स्पष्ट निर्देश उच्च व तंत्र शिक्षण मंत्री चंद्रकांतदादा पाटील यांनी दिले आहेत. डॉ. होमी भाभा स्टेट युनिव्हर्सिटी येथे आयोजित राज्यातील स्वयंअर्थसहाय्यित विद्यापीठांच्या प्रायोजक मंडळाचे अध्यक्ष व कुलगुरूंच्या आढावा बैठकीत ते बोलत होते.
या आढावा बैठकीस उच्च व तंत्र शिक्षण विभागाचे अपर मुख्य सचिव बी. वेणुगोपाल रेड्डी, उच्च शिक्षण संचालक डॉ. शैलेंद्र देवळाणकर, तंत्र शिक्षण संचालक डॉ. प्रमोद नाईक, उपसचिव प्रताप लुबाळ, अमोल मुत्याल यांच्यासह विविध विद्यापीठांचे कुलगुरू व अधिकारी उपस्थित होते.
राष्ट्रीय शैक्षणिक धोरण-२०२० (NEP 2020) ची प्रभावी अंमलबजावणी करताना शैक्षणिक गुणवत्ता, प्रशासकीय कामकाज आणि विद्यार्थीहिताला प्राधान्य देण्याचे आवाहन त्यांनी केले. सर्व स्वयंअर्थसहाय्यित विद्यापीठांनी मराठी भाषा विभागाची स्थापना करावी. तसेच NAAC, NBA मानांकन आणि NIRF रँकिंगमध्ये सहभाग वाढवण्यासाठी ठोस उपाययोजना कराव्यात. चार वर्षांचा पदवी अभ्यासक्रम, इंटर्नशिपची अंमलबजावणी आणि AISHE पोर्टलवर माहिती नोंदवणे अनिवार्य. सर्व प्रवेशित विद्यार्थ्यांचे APAAR ID तयार करून Academic Bank of Credits (ABC) शी १००% मॅपिंग पूर्ण करावे.
अल्प उत्पन्न गटातील १० टक्के विद्यार्थ्यांना ५० टक्के शुल्कमाफी देण्याबाबत बैठकीत सकारात्मक चर्चा झाली. विद्यापीठांनी सामाजिक बांधिलकी जपत शैक्षणिक संधी उपलब्ध करून द्याव्यात, असे मत मंत्री पाटील यांनी व्यक्त केले. गव्हर्निंग बॉडी, बोर्ड ऑफ मॅनेजमेंट, ॲकॅडेमिक कौन्सिल आणि परीक्षा मंडळाच्या बैठका वेळेवर घेऊन निर्णयांची अंमलबजावणी करावी. विद्यापीठांनी वार्षिक अहवाल वेळेत सादर करावा, असे निर्देश अपर मुख्य सचिव बी. वेणुगोपाल रेड्डी यांनी दिले.
