बी. जे. वैद्यकीय महाविद्यालयातील ३१ अध्यापक पदे कपात; शिक्षक संघटनेचे तीव्र आंदोलन
पुण्यातील बी. जे. मेडिकल कॉलेजमधील सुधारित कर्मचारी रचनेमुळे प्राध्यापकांच्या ३१ जागा कमी करण्यात आल्या आहेत; यावरून अध्यापन, रुग्णसेवा आणि प्रशासकीय कामाचा बोजा यांबाबत निषेध व्यक्त केला जात आहे.
Eduvarta
एज्युवार्ता न्यूज नेटवर्क
वैद्यकीय शिक्षण व औषधी द्रव्ये विभागाने सहा विभागांसाठी जारी केलेल्या सुधारित आकृतीबंधामुळे पुण्यातील बी. जे. शासकीय वैद्यकीय महाविद्यालयात एकूण ३१ अध्यापक पदे कमी झाली आहेत. यामध्ये सहा प्राध्यापक, बारा सहयोगी प्राध्यापक आणि तेरा सहाय्यक प्राध्यापक पदांचा समावेश आहे. या निर्णयामुळे अध्यापन, रुग्णसेवा आणि प्रशासकीय कामकाजावर गंभीर परिणाम होण्याची शक्यता असल्याचा दावा करत महाराष्ट्र राज्य वैद्यकीय शिक्षक संघटनेने महाविद्यालयात आंदोलन केले.
शरीररचनाशास्त्र, शरीरक्रियाशास्त्र, जीवरसायनशास्त्र, सूक्ष्मजीवशास्त्र, न्यायवैद्यकशास्त्र आणि जन औषध वैद्यकशास्त्र या सहा विभागांसाठी हा सुधारित आकृतीबंध लागू करण्यात आला आहे. त्यामुळे राज्यातील विविध संवर्गांतील एकूण १५८ अध्यापक पदे कमी झाली आहेत. संघटनेच्या म्हणण्यानुसार बी. जे. वैद्यकीय महाविद्यालय आणि ससून सर्वोपचार रुग्णालयात सध्या उपलब्ध अध्यापक वर्गच अपुरा आहे. अध्यापकांना अध्यापनासोबतच रुग्णसेवा आणि अतिरिक्त प्रशासकीय जबाबदाऱ्या पार पाडाव्या लागतात.
पदकपातीमुळे पदवीपूर्व व पदव्युत्तर शिक्षणाबरोबरच रुग्णसेवेवर थेट परिणाम होईल, असा इशारा संघटनेने दिला आहे. भारतीय आयुर्विज्ञान आयोगाच्या किमान मानकांचा आधार घेऊन आकृतीबंध तयार केला असला, तरी प्रत्यक्ष संस्थेतील कामाचा ताण, रुग्णसंख्या, अध्यापन आणि प्रशासकीय जबाबदाऱ्यांचा पुरेसा विचार झालेला नाही, असा आरोप संघटनेने केला आहे. महाराष्ट्र गव्हर्मेंट नर्सेस असोसिएशन आणि निवासी डॉक्टर संघटनेनेही या मागणीला पाठिंबा दर्शविला आहे.
संघटनेने सुधारित आकृतीबंध तातडीने रद्द करण्याची आणि भविष्यात आकृतीबंध तयार करताना संबंधित संस्थेतील रुग्णसेवा, अध्यापन व प्रशासकीय कामकाजाचा प्रत्यक्ष विचार करण्याची मागणी केली आहे. शिक्षकवर्गाने सातत्याने दर्जेदार शिक्षण आणि रुग्णसेवा देत असताना पदे कमी करणे योग्य नसल्याचे मत व्यक्त करत संघटना आंदोलन सुरू ठेवण्याच्या तयारीत आहे.
