महाराष्ट्र एज्युकेशन सोसायटीच्या  गुणवंत विद्यार्थ्यांचा गुणगौरव समारंभ 

एज्युवार्ता न्यूज नेटवर्क 

महाराष्ट्र राज्य माध्यमिक व उच्च माध्यमिक शिक्षण मंडळातर्फे घेण्यात आलेल्या इयत्ता दहावी - बाराच्या परीक्षेत महाराष्ट्र एज्युकेशन सोसायटी (म.ए.सो.)च्या सर्व शाळा व कनिष्ठ महाविद्यालयांमधून प्रथम क्रमांकाने उत्तीर्ण झालेल्या गुणवंत विद्यार्थ्यांचा गुणगौरव समारंभ येत्या ५ ऑगस्ट रोजी दुपारी ४ वाजता आयोजित करण्यात आला आहे.

कोथरूड येथील म.ए.सो. ऑडिटोरियममध्ये होणाऱ्या या समारंभात चितळे बंधूचे मॅनेजिंग पार्टनर इंद्रनील चितळे यांच्या हस्ते गुणवंत विद्यार्थ्यांचा सन्मान करण्यात येणार आहे. कार्यक्रमाच्या अध्यक्षस्थानी महाराष्ट्र एज्युकेशन सोसायटीचे अध्यक्ष एअर मार्शल भूषण गोखले (निवृत्त) असतील. तसेच सोसायटीचे उपाध्यक्ष प्रदीप नाईक यांची विशेष उपस्थिती लाभणार आहे.

महाराष्ट्र एज्युकेशन सोसायटीच्या नियामक मंडळाचे अध्यक्ष बाबासाहेब शिंदे,संस्थेचे  सचिव डॉ. अतुल कुलकर्णी, नियामक मंडळाच्या उपाध्यक्षा आनंदी पाटील,  तसेच सर्व नियामक मंडळ व आजीव सदस्य मंडळ यांच्या वतीने म.ए.सो. परिवारातील विद्यार्थी, पालक, शिक्षक, माजी विद्यार्थी आणि हितचिंतकांनी या समारंभास उपस्थित राहून गुणवंत विद्यार्थ्यांचे कौतुक करण्याचे आवाहन करण्यात आले आहे.

हा गुणगौरव समारंभ म.ए.सो. ऑडिटोरियम, मयूर कॉलनी, कोथरूड, पुणे येथे आयोजित करण्यात आला असून, संस्थेच्या विविध शैक्षणिक घटकांतील गुणवंत विद्यार्थ्यांचा यावेळी गौरव केला जाणार आहे.