बँकेत नोकरीची संधी,  बडोदा बँकेत मोठी भरती प्रक्रिया सुरू; 'या' तारखेपर्यंत करा अर्ज

एज्युवार्ता न्यूज नेटवर्क 

बँक ऑफ बडोदाने (Bank of Baroda) (बीओबी) डिजिटल बँकिंग, आयटी, डेटा सायन्स, अभियांत्रिकी, सुरक्षा आणि लेखा या संबंधित विविध विभागांमधील एकूण २०६ पदांसाठी भरतीची (Recruitment for a total of 206 posts) अधिसूचना प्रसिद्ध केली आहे. सरकारी बँकेतील नोकरीची तयारी (job in a government bank) करणाऱ्या तरुणांसाठी ही आनंदाची बातमी आहे. या भरती प्रक्रियेमध्ये मॅनेजर, सिनियर मॅनेजर, टेक्निकल ऑफिसर, डेटा सायंटिस्ट, सिक्युरिटी मॅनेजर (Manager, Senior Manager ,Security Manager vacancies) आणि इन्व्हेस्टर रिलेशन्स यांसारख्या पदांचा समावेश आहे.

इच्छुक उमेदवारांना २६ ऑगस्ट २०२६ पर्यंत बँक ऑफ बडोदाच्या अधिकृत वेबसाइटवरून ऑनलाइन अर्ज करता येईल. अभियांत्रिकी, संगणकशास्त्र, आयटी, वाणिज्य आणि इतर शाखांमध्ये पदवी किंवा पदव्युत्तर पदवी असलेले उमेदवार या पदांसाठी अर्ज करू शकतात. सीए (CA) आणि आयसीडब्ल्यूए (ICWA) यांसारखी व्यावसायिक पात्रता असलेल्या उमेदवारांसाठीही अनेक पदे उपलब्ध आहेत. वेगवेगळ्या पदांसाठी २ ते १० वर्षांचा संबंधित कामाचा अनुभव आवश्यक आहे.

शैक्षणिक पात्रता आणि वयोमर्यादा पदानुसार भिन्न आहेत. डिजिटल उत्पादने, माहिती सुरक्षा आणि डेटा सायन्सशी संबंधित पदांसाठी अनुभवासह बीई/बीटेक, एमसीए, एमएससी किंवा संबंधित पदवी आवश्यक आहे. सिव्हिल आणि इलेक्ट्रिकल टेक्निकल ऑफिसर पदांसाठी संबंधित अभियांत्रिकी शाखेतील पदवी असणे गरजेचे आहे, तर टॅक्सेशन आणि अकाउंट्स पदांसाठी सीए किंवा आयसीडब्ल्यूए अनिवार्य आहे.

सर्वसाधारण, ओबीसी आणि ईडब्ल्यूएस प्रवर्गासाठी अर्ज शुल्क ८५० रुपये असून, एससी, एसटी, दिव्यांग, माजी सैनिक आणि महिला उमेदवारांसाठी ते १७५ रुपये आहे. पदनिहाय वयोमर्यादा २३ वर्षांपासून सुरू होऊन ४३ वर्षांपर्यंत आहे. शासकीय नियमांनुसार राखीव प्रवर्गातील उमेदवारांना वयोमर्यादेत सवलत मिळेल.

उमेदवारांनी अधिकृत वेबसाइटवर जाऊन संपूर्ण अधिसूचना काळजीपूर्वक वाचावी आणि आवश्यक कागदपत्रे तयार ठेवावीत. मुदत संपण्यापूर्वी अर्ज सादर करणे आवश्यक आहे. योग्य पात्रता आणि अनुभव असलेल्या तरुणांसाठी ही बँक ऑफ बडोदातील नोकरीची मोठी संधी ठरू शकते.