"मुलांना घेऊन जा... गेट लॉस्ट!" बाहेरून वह्या घेतल्याने मुख्याध्यापिकेचा पालकांवर संताप; व्हिडिओ व्हायरल

एज्युवार्ता न्यूज नेटवर्क 

खाजगी शाळांमध्ये वह्या-पुस्तके, गणवेश आणि इतर शैक्षणिक साहित्य शाळेतूनच खरेदी करण्याची सक्ती आणि त्यामागील कमिशनचा खेळ यावरुन पालक-शाळा यांच्यातील तणाव वाढत चालला आहे. याच पार्श्वभूमीवर उत्तर प्रदेशातील हरदोई येथील एका नामांकित सनबीम स्कूलच्या (SUNBEAM SCHOOL UP) मुख्याध्यापिका ममता मिश्रा यांचा एक धक्कादायक व्हिडिओ सोशल मीडियावर व्हायरल झाला आहे. सीनिअर केजीत शिकणाऱ्या चिमुकल्याच्या (Students in Sr. KG) आईला फक्त बाहेरून वह्या घेतल्याच्या रागातून मुख्याध्यापिकेने (The Headmistress's Outrage) अर्वाच्य भाषेत धमकी (A Threat to Parents) दिल्याचा हा प्रकार यातून समोर आला आहे. 

व्हायरल व्हिडिओत मुख्याध्यापिका ममता मिश्रा एका पालकांवर जोरजोरात ओरडताना दिसत आहेत. "यांच्या मुलाचे नाव आत्ताच्या आत्ता रजिस्टरमधून काढून टाका... चालते व्हा इथून... शट अप... गेट लॉस्ट!" अशा शब्दांत त्यांनी पालकांचा अपमान केल्याचे दिसून येत आहे. पालकांनी शाळेच्या दुकानातून वह्या न घेता बाहेरून खरेदी केल्याने हा वाद उफाळला. शाळा व्यवस्थापनाने सर्व साहित्य शाळेतूनच घेण्याचा आग्रह धरला होता. मात्र, पालक नीलम वर्मा यांनी शाळेच्या शिफारस केलेल्या दुकानातून पुस्तके घेतली, पण वह्या मात्र स्वस्तात बाहेरून आणल्या. याच मुद्द्यावरुन मुख्याध्यापिकेने संताप व्यक्त केला.

व्हिडिओ व्हायरल झाल्यानंतर मुख्याध्यापिका ममता मिश्रा यांनी स्पष्टीकरण दिले. "पालक गेल्या काही दिवसांपासून शुल्कावरुन त्रास देत होते. लसीकरण शिबिर चालू असताना त्यांनी जाणूनबुजून गोंधळ घातला," असे त्यांचे म्हणणे आहे. मात्र पालक आणि नेटिझन्स यांचा दावा आहे की, शाळा फायद्यासाठी महागड्या वह्या-नोटबुक्स विकण्याचा धंदा चालवत आहे. जिल्हा शिक्षण अधिकारी यांनी याची गंभीर दखल घेतली आहे. "शिक्षकांची भाषा संयमित असावी. पालकांशी असे वर्तन आपल्या संस्कृतीला शोभत नाही," असे त्यांनी सांगितले. 

शाळेच्या मान्यतेची आणि पहिली ते पाचवी बेकायदेशीर वर्ग चालवण्याची चौकशी सुरू झाली आहे. पालक संघटना आणि सोशल मीडियावरुन प्रचंड रोष व्यक्त होत आहे. "शाळा शिक्षणासाठी असते की व्यवसायासाठी?" असा सवाल उपस्थित केला जात आहे. खाजगी शाळांमधील अशा सक्तीमुळे सर्वसामान्य पालक आर्थिक आणि मानसिक त्रास सहन करत आहेत. या प्रकरणात प्रशासन काय कारवाई करते, याकडे सर्वांचे लक्ष लागले आहे.