'एमपीएससी'ची कमाल! नागरी सेवा पूर्व परीक्षेचा निकाल फक्त २२ दिवसांत जाहीर 

एज्युवार्ता न्यूज नेटवर्क

नेहमी लांबणाऱ्या परीक्षा आणि निकालांच्या दिरंगाईमुळे टीकेचे धनी ठरणाऱ्या महाराष्ट्र लोकसेवा आयोगाने (MPSC) यंदा एक ऐतिहासिक कामगिरी केली आहे. आयोगाने ३१ मे रोजी घेतलेल्या ‘महाराष्ट्र राजपत्रित नागरी सेवा संयुक्त पूर्व परीक्षा-२०२५’ (Civil Services Combined Preliminary Examination-2025) राज्य सेवा गट-अ व गट-ब चा निकाल अवघ्या २२ दिवसांत, जाहीर (Results declared in just 22 days) केला आहे. एमपीएससीच्या इतिहासात पहिल्यांदाच इतक्या जलद गतीने निकाल लागल्यामुळे स्पर्धा परीक्षा विश्वातून आश्चर्य आणि समाधान व्यक्त होत आहे. 

केंद्रीय लोकसेवा आयोगाचे (यूपीएससी) निकाल साधारणतः २३दिवसांत जाहीर होणे अपेक्षित असते. मात्र, मागील काही वर्षांचा इतिहास बघितला तर महिना दोन-दोन महिने उलटले तरी निकाल प्रसिद्ध केला जात नव्हता. यामुळे हजारो विद्यार्थ्यांना अनेक दिवस निकालाची प्रतीक्षा करत ताटकळत बसावे लागत होते. आता मात्र एमपीएससीने अवघ्या २२ दिवसांत निकाल लावत केंद्रीय आयोगाच्या गतीलाही मागे टाकले आहे. त्यामुळे विद्यार्थ्यांमध्ये आनंदाचे वातावरण पाहायला मिळत आहे. 

मुख्य परीक्षा संदर्भातील सर्वसाधारण अधिसूचना आणि अर्ज भरण्याची प्रक्रिया आयोगाकडून स्वतंत्रपणे जाहीर केली जाईल. तसेच सामाजिक व शैक्षणिकदृष्ट्या मागासवर्गीय (एसईबीसी) आरक्षणासंदर्भात मुंबई उच्च न्यायालयात दाखल याचिका, तसेच इतर आरक्षणांसंदर्भात न्यायाधिकरणात प्रलंबित असलेल्या न्यायिक प्रकरणांमधील अंतिम निर्णयांच्या अधीन राहून हा पूर्व परीक्षेचा निकाल प्रसिद्ध करण्यात आला आहे, अशी स्पष्ट सूचना आयोगाने दिली आहे.

पूर्व परीक्षेतून मुख्य परीक्षेसाठी पात्र ठरलेल्या उमेदवारांची नावे, त्यांचे बैठकी क्रमांक आणि कट-ऑफ मार्क्स आयोगाच्या संकेतस्थळावर प्रसिद्ध करण्यात आली आहे. दरवर्षी परीक्षांचे वेळापत्रक कोलमडल्यामुळे आणि निकाल रखडल्यामुळे एमपीएससीवर राज्य सरकार आणि लोकप्रतिनिधींकडून सातत्याने टीका होत होती. या पार्श्वभूमीवर, राज्य सरकारने एमपीएससीच्या परीक्षा आणि निकालांना गती देण्यासाठी एक नवीन धोरण आखून सुरळीत कार्यक्रम तयार केला होता. त्यानुसार काम सुरू असल्याचे बोलले जात आहे.