मॉडर्न कॉलेजविरोधात ABVPचे आंदोलन

एज्युवार्ता न्यूज नेटवर्क 

पुण्यातील शिवाजीनगर भागातील नामांकित मॉडन कॉलेजमध्ये शिक्षण घेत असलेल्या Arts, Commerce, Science तसेच BBA विभागातील विद्यार्थ्यांना भेडसावणाऱ्या गंभीर व मूलभूत समस्यांमुळे विद्यार्थ्यांमध्ये असंतोषाचे वातावरण निर्माण झाले आहे. तसेच अनेक विद्यार्थ्यांच्या गुणपत्रकांमध्ये टक्केवारीतील गंभीर त्रुटी आढळून येत असून यामुळे विद्यार्थ्यांच्या भविष्यातील संधी धोक्यात येत आहेत.महाविद्यालयाला दीर्घ शैक्षणिक परंपरा लाभलेली असतानाही  प्रशासकीय उदासीनतेमुळे विद्यार्थ्यांच्या शैक्षणिक, सामाजिक व मानसिकतेवर त्याचा थेट परिणाम होत आहे.त्यामुळे कॉलेज प्रशासनाने या समस्यांकडे लक्ष देऊन त्या तात्काळ सोडवाव्यात, अन्यथा तीव्र आंदोलन केले जाईल, असा इशारा आखील भारतीय विद्यार्थी परिषदेतर्फे देण्यात आला.
 
विद्यार्थ्यांना शिष्यवृत्ती वेळेवर न मिळणे, सुरक्षा व्यवस्थेचा अभाव असणे, पिण्याच्या पाण्याची अपुरी सुविधा असणे, स्वच्छतेकडे केलेले दुर्लक्ष, संगणक प्रयोगशाळेची दयनीय अवस्था, निष्क्रिय प्लेसमेंट सेल तसेच प्रशासकीय कामकाजातील अक्षम्य हलगर्जीपणा यामुळे विद्यार्थ्यांचे शैक्षणिक नुकसान होत आहे.आर्थिकदृष्ट्या दुर्बल घटकातील अनेक विद्यार्थी या परिस्थितीमुळे शिक्षण सोडण्याच्या मानसिकतेपर्यंत पोहोचले आहेत, ही अत्यंत गंभीर बाब आहे.

महाविद्यालय परिसरात CCTV कॅमेरे कार्यान्वित नसणे, First Aid Kit चा अभाव असणे , मुलींच्या स्वच्छतागृहांची दयनीय अवस्था असणे तसेच Sanitary Pad सुविधेचा अभाव यामुळे विशेषतः विद्यार्थिनीमध्ये असुरक्षिततेची भावना निर्माण झाली आहे. क्रीडा व शारीरिक विकासाकडे पूर्णतः दुर्लक्ष करण्यात आले असून, मैदान व क्रीडासाहित्याची अवस्था अत्यंत खराब आहे. एकाच शिक्षकांकडून सलग तीन व्याख्याने घेण्याची पद्धत अध्यापनाच्या गुणवत्तेवर गंभीर परिणाम करत आहे. अनेकदा व्याख्याने अचानक रद्द केली जात असल्याने विद्यार्थ्यांचा वेळ, पैसा व ऊर्जा वाया जात आहे.तसेच कॉलेजच्या अधिकृत ग्रुपवर विशिष्ट राजकीय पक्षाचा प्रचार होणे हे शैक्षणिक संस्थेच्या तटस्थतेला धक्का देणारी व निदनीय बाब आहे.,असेही अभाविपने पत्रकात नमूद केले आहे. 

विशेषतः BBA महाविद्यालयीन कॅम्पसमध्ये गेल्या दोन वर्षांपासून कंटीन सुविधा बंद असून, बसण्याच्या मूलभूत सुविधांचा अभाव, केवळ नावापुरते ग्रंथालय, कला मंडळासाठी Coordinator नसणे, बांधकाम साहित्यामुळे होणारा रोजचा त्रास तसेच परीक्षा शुल्काच्या नावाखाली होणारी आर्थिक पिळवणूक होत आहे. काही बॅकलॉग विषयांच्या परीक्षा न घेताही त्यांचे शुल्क आकारले जात असल्याचे प्रकार समोर येत असून ही विद्यार्थ्यांची सरळसरळ आर्थिक फसवणूक आहे.

Arts/Commerce / Science आणि BBA हे कॅम्पस स्वतंत्र असल्यामुळे दोन्ही कॅम्पससाठी स्वतंत्र सुविधा, सुरक्षा व्यवस्था व सक्षम प्रशासकीय यंत्रणा तातडीने उभी करणे ही विद्यार्थ्यांची ठाम व रास्त मागणी आहे. या सर्व समस्या केवळ तांत्रिक स्वरूपाच्या नसून विद्यार्थ्यांच्या सुरक्षा, आरोग्य, आत्मसन्मान व भवितव्याशी निगडित अत्यंत गंभीर बाबी आहेत. वारंवार निवेदने देऊनही महाविद्यालय प्रशासनाकडून कोणतीही ठोस कार्यवाही न होणे ही दुर्दैवी बाब आहे.

महाविद्यालय प्रशासनाने वरील सर्व समस्यांची तातडीने दखल घेऊन ठराविक कालमयदित लेखी स्वरूपात उपाययोजना जाहीर कराव्यात, अन्यथा विद्यार्थ्यांच्या हितासाठी अखिल भारतीय विद्यार्थी परिषद (ABVP) ला संघटनात्मक व लोकशाही मार्गाने तीव्र आंदोलनाचा पवित्रा घ्यावा लागेल, असा स्पष्ट इशारा अभाविपने दिला असून त्याबाबतचे पत्रक प्रसिद्ध केले आहे.

------------

कोणत्याही राजकीय पक्षाशी प्रोग्रेसिव्ह एज्युकेशन सोसायटी या संस्थेचा संबंध नाही. संस्थेचा प्रमुख म्हणून मी कोणत्याही उमेदवाराच्या प्रचारात प्रत्यक्ष सहभागी झालो नाही. तसेच सोशल मीडियावर विशिष्ट पक्षाचा प्रचारही करण्यात आला नाही. काकासाहेब गाडगीळ, बाळासाहेब भारदे, बॅरिस्टर व्ही. एन. गाडगीळ अशा अनेक ज्येष्ठ कॉग्रेस पक्षाच्या नेत्यांनी संस्थेचे अध्यक्षपद भूषवले होते. त्यांनीही कोणत्याही राजकीय पक्षासाठी संस्थेच्या माध्यमातून काम केले नाही. गेल्या 40 वर्षांपासून मी संस्थेचा प्रमुख म्हणून काम पाहत आहे. माझ्याकडूनही कोणत्याही विशिष्ट पक्षाचा प्रचार होऊ नये, याबाबत मी नेहमीच काळजी घेतली आहे.सर्व राजकीय पक्षाशी संस्थेचे चांगले संबंध आहेत. 

- डॉ. गजानन एकबोटे, कार्याध्यक्ष, प्रोग्रेसिव्हिल एज्युकेशन सोसायटी