सोलापूरात तीन नवीन शासकीय अभियांत्रिकी कॉलेजला मान्यता
या नवीन महाविद्यालयात कृत्रिम बुद्धिमत्ता व मशीन लर्निंग (AI & Machine Learning), संगणक अभियांत्रिकी (Computer Science & Engineering) आणि इलेक्ट्रॉनिक्स व टेलिकम्युनिकेशन (Electronics & Telecommunication) हे तीन पदवी अभ्यासक्रम सुरू होणार आहेत. प्रत्येक अभ्यासक्रमाची प्रवेश क्षमता ६० विद्यार्थ्यांची असेल.
eduvarta@gmail.com 
एज्युवार्ता न्यूज नेटवर्क
सोलापूर शहरातील शासकीय तंत्रनिकेतनच्या ठिकाणी नवीन शासकीय अभियांत्रिकी व तंत्रज्ञान संस्था (Government Institute of Engineering and Technology, Solapur) स्थापन करण्यास राज्य मंत्रिमंडळ बैठकीत मान्यता देण्यात आली आहे. तसेच या शैक्षणिक वर्षापासून (सन २०२६-२७) पदवीस्तरावरील तीन अभियांत्रिकी अभ्यासक्रम सुरू करण्यासही मंजुरी देण्यात आली आहे.
मुख्यमंत्री देवेंद्र फडणवीस यांच्या अध्यक्षतेखाली झालेल्या मंत्रिमंडळ बैठकीत हा महत्त्वपूर्ण निर्णय घेण्यात आला. या निर्णयानुसार सोलापूरच्या शासकीय तंत्रनिकेतनचे नाव बदलून “शासकीय अभियांत्रिकी व तंत्रज्ञान संस्था, सोलापूर” असे करण्यात येणार आहे.
या नवीन महाविद्यालयात कृत्रिम बुद्धिमत्ता व मशीन लर्निंग (AI & Machine Learning), संगणक अभियांत्रिकी (Computer Science & Engineering) आणि इलेक्ट्रॉनिक्स व टेलिकम्युनिकेशन (Electronics & Telecommunication) हे तीन पदवी अभ्यासक्रम सुरू होणार आहेत. प्रत्येक अभ्यासक्रमाची प्रवेश क्षमता ६० विद्यार्थ्यांची असेल. त्यामुळे एकूण १८० विद्यार्थ्यांना सोलापूरमध्येच अभियांत्रिकी शिक्षणाची संधी उपलब्ध होणार आहे.
या संस्थेच्या स्थापनेसाठी टप्प्याटप्प्याने ३९ नियमित शिक्षक पदे आणि ३८ शिक्षकेतर पदे (२२ नियमित व १६ बाह्ययंत्रणेद्वारे) निर्माण करण्यास मान्यता देण्यात आली आहे. तसेच पुढील चार वर्षांसाठी एकूण १५७ कोटी ६६ लाख २ हजार रुपये खर्चास मंजुरी देण्यात आली आहे.
याशिवाय, संस्थेच्या इमारत दुरुस्ती, डागडुजी आणि आवश्यक सुविधा उभारणीसाठी ११ कोटी रुपयांचा स्वतंत्र निधी उपलब्ध करून देण्यासही मंत्रिमंडळाने मान्यता दिली आहे. या निर्णयामुळे सोलापूर आणि परिसरातील विद्यार्थ्यांना उच्च तांत्रिक शिक्षणासाठी मोठी संधी उपलब्ध झाली असून, स्थानिक शैक्षणिक विकासाला चालना मिळणार असल्याचे मत व्यक्त केले जात आहे.
दरम्यान, धाराशिव जिल्ह्यातील तुळजापूर येथे तुळजाभवानी मंदिर संस्थानमार्फत चालविण्यात येणारे श्री. तुळजाभवानी अभियांत्रिकी महाविद्यालय राज्य शासनाच्या उच्च व तंत्र शिक्षण विभागाकडे कायमस्वरूपी हस्तांतरित करण्यास आज राज्य मंत्रिमंडळाच्या बैठकीत मान्यता देण्यात आली.
