एमबीबीएस-बीडीएस प्रवेशाची तिसरी फेरी जाहीर; २६ सप्टेंबरपर्यंत नोंदणी प्रक्रिया
राज्यातील वैद्यकीय आणि दंतवैद्यकीय अभ्यासक्रमांच्या प्रवेशासाठी केंद्रीय प्रवेश प्रक्रियेची कॅप तिसरी फेरी अधिकृतपणे जाहीर झाली आहे. एमबीबीएस आणि बीडीएस अभ्यासक्रमांमधील दुसऱ्या फेरीनंतर रिक्त राहिलेल्या जागा भरण्यासाठी ही फेरी राबविण्यात येणार आहे.
Eduvarta
एज्युवार्ता न्यूज नेटवर्क
राज्यातील वैद्यकीय आणि दंतवैद्यकीय अभ्यासक्रमांच्या प्रवेशासाठी केंद्रीय प्रवेश प्रक्रियेची (कॅप) तिसरी फेरी अधिकृतपणे जाहीर झाली आहे. एमबीबीएस आणि बीडीएस अभ्यासक्रमांमधील दुसऱ्या फेरीनंतर रिक्त राहिलेल्या जागा भरण्यासाठी ही फेरी राबविण्यात येणार आहे. वैद्यकीय समुपदेशन समितीच्या अखिल भारतीय कोटा व राज्य समुपदेशन वेळापत्रकाचा विचार करून सीईटी सेलने हे वेळापत्रक निश्चित केले आहे. इच्छुक विद्यार्थ्यांनी २६ सप्टेंबरपर्यंत नोंदणी पूर्ण करणे आवश्यक आहे.
तिसऱ्या फेरीसाठी ऑनलाइन नोंदणी आणि सेशन अप्लाय करण्याची मुदत २६ सप्टेंबर रोजी सायंकाळी ६ वाजेपर्यंत आहे. नोंदणी शुल्क त्याच दिवशी रात्री आठ वाजेपर्यंत ऑनलाइन भरावे लागेल. शुल्क यशस्वीरीत्या भरल्यानंतरच नोंदणी पूर्ण मानली जाईल. आवश्यक मूळ कागदपत्रांच्या रंगीत स्कॅन प्रती रात्री अकरा वाजेपर्यंत अपलोड करून सबमिट करणे बंधनकारक आहे. सबमिट न केल्यास अर्ज नाकारला जाऊ शकतो.
नव्याने नोंदणी करणाऱ्या उमेदवारांची ऑनलाइन कागदपत्र पडताळणी २८ सप्टेंबरपर्यंत होईल. नोंदणीकृत उमेदवारांची एकत्रित यादी व तात्पुरती गुणवत्ता यादी २९ सप्टेंबरला प्रसिद्ध होईल. त्यावर हरकती किंवा तक्रारी ३० सप्टेंबर ते १ ऑक्टोबर रात्री ११.५९ वाजेपर्यंत नोंदविता येतील. मात्र दुरुस्तीसाठी संबंधित पुरावा सादर करणे अनिवार्य राहील. अंतिम गुणवत्ता यादी ५ ऑक्टोबरला जाहीर होईल.
उपलब्ध जागांची वर्गवारी ६ ऑक्टोबरला प्रसिद्ध होईल. त्यानंतर ७ ते ९ ऑक्टोबरदरम्यान रात्री ११.५९ वाजेपर्यंत उमेदवार महाविद्यालय व अभ्यासक्रमांचे प्राधान्यक्रम ऑनलाइन भरू शकतील. तिसऱ्या फेरीची निवड यादी ११ ऑक्टोबरला जाहीर होईल.
निवड झालेल्या विद्यार्थ्यांना ११ ते १४ ऑक्टोबरदरम्यान सायंकाळी ५.३० वाजेपर्यंत मूळ कागदपत्रे आणि आवश्यक शुल्काच्या डिमांड ड्राफ्टसह संबंधित महाविद्यालयात प्रत्यक्ष उपस्थित राहून प्रवेश निश्चित करावा लागेल. यानंतरच्या स्ट्रे व्हेकन्सी फेऱ्यांचे वेळापत्रक स्वतंत्रपणे जाहीर केले जाईल. उमेदवारांनी अधिकृत वेबसाइटवर नियमित तपासणी करावी, असे आवाहन करण्यात आले आहे.
