विद्यार्थ्यांसाठी निर्भय व मुक्त वातावरण हवे : विकासचंद्र रस्तोगी 

एज्युवार्ता न्यूज नेटवर्क 

विद्यार्थांना शैक्षणिक परिसरात मनमोकळेपणाने वावरण्यासाठी (Allow students to move freely in the academic environment)निर्भय व मुक्त वातावरण हवे. शैक्षणिक संस्थेत तसे वातावरण निर्माण करण्यासाठी संस्थांनी पुढाकार घ्यावा. तसेच आधुनिक तंत्रज्ञानाच्या सहाय्याने महिला सुरक्षिततेच्या दृष्टीकोनातून सर्व सोयी सुविधा संस्थेमध्ये असणे गरजेचे आहे. काही अनुचित घटना घडत असताना त्यासंदर्भात तक्रार अथवा मदत मिळण्यासाठी ज्या यंत्रणा उपलब्ध आहे, त्यांची माहिती ठळक स्वरूपात शैक्षणिक संस्थांमध्ये असली पाहिजे. तसेच महिला सुरक्षेच्या (Womens safety)अनुषंगाने युजीसीच्या मार्गदर्शक तत्त्वांचे पालनही शैक्षणिक संस्थांनी करावे, अशा सूचना राज्याच्या उच्च व तंत्र शिक्षण विभागाचे प्रधान सचिव विकासचंद्र रस्तोगी (Vikas Chandra Rastogi) यांनी केले.

सावित्रीबाई फुले पुणे विद्यापीठ व राज्याच्या उच्च व तंत्र शिक्षण विभागातर्फे आयोजित ‘महिला सुरक्षितता व शिष्यवृत्ती’ विषयक कार्यशाळेच्या उद्घाटन प्रसंगी ऑनलाईन प्रणालीद्वारे रस्तोगी बोलत होते. यावेळी विद्यापीठचे कुलगुरू प्रा. डॉ. सुरेश गोसावी, प्र - कुलगुरू डॉ. पराग काळकर, उच्च व तंत्र शिक्षण विभागाचे संचालक डॉ. शैलेंद्र देवळाणकर,  तंत्रशिक्षण संचालक डॉ. विनोद मोहीतकर, पुण्याचे विभागीय आयुक्त डॉ. चंद्रकांत पुलकुंडवार, ॲङ एस.  के. जैन, व्यवस्थापन परिषद सदस्य, अधिसभा सदस्य, विद्यापरिषद सदस्य, विद्यापीठाशी संलग्नित परिसंस्था व महाविद्यालयांचे प्राचार्य, शिक्षक, शिक्षकेतर सेवक आणि विद्यार्थी उपस्थित होते.

डॉ. सुरेश गोसावी, सावित्रीबाई फुले पुणे विद्यापीठात विद्यार्थिनींच्या सुरक्षेच्या दृष्टीने युजीसीच्या मार्गदर्शक तत्त्वांचे तंतोतंत पालन होतच असते. त्याबरोबरच विविध मार्गदर्शनपर शिबिरे घेण्यासाठी तसेच जनजागृतीसाठी विद्यापीठ नेहमी पुढाकार घेत आहे.

शैलेंद्र देवळाणकर म्हणाले, एनईपी २०२४ -२५ ची अंमलबजावणी करत असताना यामध्ये महिला सुरक्षितता हा विषय महत्त्वाचा आहे. उत्तर प्रदेश राज्यानंतर सर्वात जास्त विद्यार्थी संख्या असलेले महाराष्ट्र राज्य आहे. राज्यातल्या सर्व शैक्षणिक संस्थांमधील प्राचार्य, शिक्षक आणि शिक्षकेतर कर्मचारी आयोजित या कार्यशाळेच्या माध्यमातून महिला सुरक्षा संदेश मोठ्या प्रमाणात विद्यार्थ्यांपर्यंत पोहोचला जावा हा या कार्यशाळेचा हेतू आहे. 

 महिला सुरक्षेच्या दृष्टीने संस्थांनी पालकत्वाच्या भावनेतून संवेदनशील रहावे आणि समाजातल्या प्रत्येक घटकाने त्यांच्या सुरक्षेच्या दृष्टीने सजग आणि संवेदनशील असणे आवश्यक आहे, असे पुण्याचे विभागीय आयुक्त डॉ. चंद्रकांत पुलकुंडवार यांनी कार्यशाळेस मार्गदर्शन करताना सांगितले. उच्च व तंत्र शिक्षण विभागाचे संचालक डॉ. विनोद मोहितकर यांनी महिला सुरक्षेसंदर्भात मार्गदर्शन करताना मुलींच्या मोफत व्यावसायिक शिक्षणाची अंमलबजावणी यावर्षापासून करण्यात येत असून त्यांची नोंदणी शैक्षणिक संस्थांमध्ये योग्य प्रमाणात होणे आवश्यक असल्याचे यावेळी सांगितले.

दरम्यान पुणे, अहमदनगर व नाशिक या तीन जिल्ह्यातील सुमारे 500 प्राचार्य या कार्यशाळेस उपस्थित होते. त्यात प्राचार्य व कर्मचाऱ्यांनी उपस्थित केलेल्या शिष्यवृत्ती विषयक प्रश्नांची उत्तरे देण्यात आली. कार्यक्रमाचे सूत्रसंचालन प्रा. डॉ. सदानंद भोसले यांनी केले तर आभार प्र - कुलगुरु प्रा. डॉ. पराग काळकर यांनी व्यक्त केले.