पुण्यात धक्कादायक प्रकार; सहलीत इन्स्टाग्राम वाद अन् शाळेत नववीच्या विद्यार्थिनीवर चाकू हल्ला
पुण्यातील पिंपरी-चिंचवड परिसरात एका नामांकित शाळेत धक्कादायक घटना घडली. महाळुंगे येथील शाळेत नववीत शिकणाऱ्या एका विद्यार्थिनीवर चाकूने जीवघेणा हल्ला झाला. इन्स्टाग्रामवर व्हिडिओ पाठवल्याच्या कारणाने झालेल्या वादातून ही घटना घडली असल्याचे समोर आले आहे.
Eduvarta
एज्युवार्ता न्यूज नेटवर्क
पुण्यातील पिंपरी-चिंचवड परिसरात एका नामांकित शाळेत धक्कादायक घटना घडली. महाळुंगे येथील शाळेत नववीत शिकणाऱ्या एका विद्यार्थिनीवर चाकूने जीवघेणा हल्ला झाला. इन्स्टाग्रामवर व्हिडिओ पाठवल्याच्या कारणाने झालेल्या वादातून ही घटना घडली असल्याचे समोर आले आहे. हल्ल्यामुळे मुलगी गंभीर जखमी झाली असली तरी तिची प्रकृती सध्या स्थिर आहे आणि खासगी रुग्णालयात तिच्यावर उपचार सुरू आहेत. बावधन पोलीस ठाण्याच्या हद्दीत घडलेल्या या प्रकरणाने संपूर्ण परिसर हादरला आहे.
शाळेच्या पाचगणी-महाबळेश्वर येथे आयोजित सहलीदरम्यान मुलींच्या डान्सचा व्हिडिओ इन्स्टाग्रामवर पाठवल्यामुळे विद्यार्थ्यांमध्ये वाद झाला होता. हा वाद मनात धरून एका नववीच्या विद्यार्थ्याने थेट शाळा परिसरातच संबंधित विद्यार्थिनीवर चाकूने हल्ला चढवला. हल्लेखोर विधी संघर्षित बालक असल्याने पोलिसांनी त्याला ताब्यात घेतले आहे. घटनेची माहिती मिळताच बावधन पोलिसांनी तात्काळ घटनास्थळी धाव घेतली आणि जखमी मुलीचा जबाब नोंदवून गुन्हा दाखल करण्याची प्रक्रिया सुरू केली.
पोलिसांच्या माहितीनुसार, हल्ला इतका तीव्र होता की मुलगी थोडक्यात बचावली. तिची प्रकृती स्थिर असल्याचे रुग्णालयाने सांगितले आहे. शाळा प्रशासनाने या गंभीर घटनेची दखल घेत संबंधित विद्यार्थ्यास तात्काळ शाळेतून निलंबित केले आहे. विद्यार्थ्यांच्या सुरक्षेबाबत कोणतीही कसूर राहू नये यासाठी शाळेने दप्तरांची तपासणी आणि इतर कडक प्रतिबंधात्मक उपाययोजना तातडीने राबविण्याचे ठरवले आहे. परिसरातील पालक आणि नागरिक या घटनेमुळे चिंता व्यक्त करत आहेत.
या प्रकरणात पोलिस चौकशी सुरू असून विधी संघर्षित बालकाबाबत कायदेशीर प्रक्रिया पार पाडली जाईल. शाळा प्रशासन आणि पोलिस यंत्रणा विद्यार्थ्यांच्या सुरक्षिततेसाठी अतिरिक्त दक्षता घेत आहेत. अशा घटना टाळण्यासाठी पालक आणि शाळा यांच्यात समन्वय वाढवणे आवश्यक असल्याचे स्थानिकांनी सांगितले. पिंपरी-चिंचवड पोलीस आयुक्तालयाच्या हद्दीत घडलेल्या या घटनेने संपूर्ण शहर हादरले असून पुढील चौकशी सुरू आहे.
