राजगुरुनगरमध्ये बसथांब्यावर थांबलेल्या ८ महाविद्यालयीन विद्यार्थिनीला मोटारने उडवले; एकीचा मृत्यू
राजगुरुनगर तालुक्यातील भामा-आसखेड परिसरात सकाळी भीषण रस्त्यावरील अपघात झाला. पाईट-खेड रस्त्यावरील कुरकुंडी फाटा येथील बसथांब्यावर एसटी बसची वाट पाहत उभ्या असलेल्या महाविद्यालयीन युवतींच्या गटात भरधाव मोटार आणि दुचाकी घुसली. या धडकेत एका युवतीचा जागीच मृत्यू झाला, तर ७ युवती आणि २ तरुण गंभीर जखमी झाले.
Eduvarta
एज्युवार्ता न्यूज नेटवर्क
राजगुरुनगर तालुक्यातील भामा-आसखेड परिसरात सकाळी भीषण रस्त्यावरील अपघात झाला. पाईट-खेड रस्त्यावरील कुरकुंडी फाटा येथील बसथांब्यावर एसटी बसची वाट पाहत उभ्या असलेल्या महाविद्यालयीन युवतींच्या गटात भरधाव मोटार आणि दुचाकी घुसली. या धडकेत एका युवतीचा जागीच मृत्यू झाला, तर ७ युवती आणि २ तरुण गंभीर जखमी झाले. हा अपघात सकाळी सुमारे ८ वाजता झाला.
मृत युवतीचे नाव अदिती नवनाथ राळे (वय १९, रा. कुरकुंडी, ता. खेड) असे आहे. तर जखमींमध्ये वैष्णवी चंद्रकांत भोकसे (१९), संघनी नीलेश भोकसे (१९), वैष्णवी संतोष जाधव (२०), गायत्री विठ्ठल कोळेकर (१९), पूजा भगवान घोडके (१९), संजना सुधीर राळे (१९) आणि अनुष्का नवनाथ राळे (१७) यांचा समावेश आहे. या सर्व युवती आसखेड येथील आहेत. दुचाकीवरून येणाऱ्या रोहन गारगोटे आणि ओंकार नेहरे (दोघेही रा. कडूस, ता. खेड) हेही जखमी झाले. अदितीचा रुग्णालयात उपचारादरम्यान मृत्यू झाला, तर इतरांना खासगी रुग्णालयात दाखल करण्यात आले.
नेहमीप्रमाणे शिक्षणासाठी राजगुरुनगरला जाण्यासाठी या युवती बसथांब्यावर थांबल्या होत्या. त्यावेळी एमएच १२ व्हीजी १९७७ क्रमांकाची मोटार वेगाने येत होती. कुरकुंडी गावातून कडूस दिशेने जाणाऱ्या एमएच १४ एमडब्ल्यू ३७९२ क्रमांकाच्या दुचाकीने अचानक वळण घेतले. त्याला वाचवण्याच्या प्रयत्नात मोटारचालकाचे नियंत्रण सुटले आणि दोन्ही वाहने रस्त्याच्या कडेला उभ्या असलेल्या युवतींच्या गटात शिरली. यामुळे अनेकांना चिरडून जखमा झाल्या.
मोटारचालक प्रमोद वसंत चाटे (वय ३२, रा. आळंदी, ता. खेड) घटनास्थळावरून पळून गेला. मोटारमालक विकास हिरामण कराड याला उत्तर महाळुंगे एमआयडीसी पोलिसांनी ताब्यात घेतले आहे. पोलिस पाटील वैशाली भोकसे यांनी ही माहिती दिली. अपघाताचे नेमके कारण तपासात समोर येईल.
या मोटारीत शिक्षक मतदारसंघाच्या निवडणुकीतील एका उमेदवाराचा बूथ प्रतिनिधी प्रवास करत असल्याची आणि तो पाईट मतदान केंद्राकडे घाईत असल्याने अपघात घडल्याची चर्चा प्रत्यक्षदर्शींमध्ये होती. मात्र पोलिसांनी अधिकृत तपास सुरू केला असून वस्तुस्थिती लवकरच स्पष्ट होईल. या घटनेने परिसरात शोककळा पसरली आहे.
