इयत्ता दुसरी ते चौथीच्या नवीन अभ्यासक्रमासाठी ४ मे पासून शिक्षकांचे प्रशिक्षण 

एज्युवार्त न्यूज नेटवर्क 

राज्य शैक्षणिक संशोधन व प्रशिक्षण परिषदेच्या वतीने (SCERT) इयत्ता दुसरी, तिसरी आणि चौथीच्या शिक्षकांसाठी नवीन अभ्यासक्रमानुसार (New Curriculum) प्रशिक्षणाचे आयोजन करण्यात आले आहे. २०२६-२७ या शैक्षणिक वर्षांपासून (Academic year 2026-27) लागू होणाऱ्या नवीन अभ्यासक्रमाच्या प्रभावी अंमलबजावणीसाठी हे पाऊल उचलण्यात आले आहे. ४ मेपासून शिक्षकांच्या प्रशिक्षणास (Teacher Training) सुरुवात होणार आहे. या प्रशिक्षणासाठी शिक्षकांना उपस्थित राहण्याचे बंधन आहे.

नवीन शैक्षणिक वर्ष १५ जून २०२६ पासून सुरू होत आहे. त्यापूर्वी सर्व शिक्षकांचे प्रशिक्षण पूर्ण करण्याचे उद्दिष्ट शासनाने ठेवले आहे. हे प्रशिक्षण राज्यस्तर, जिल्हास्तर आणि तालुकास्तर अशा तीन टप्प्यांत पार पडणार आहे. राज्यस्तरासाठी ४ ते ७ मे २०२६ रोजी मराठी व उर्दू माध्यमासाठी, जिल्हास्तर ११ ते १४ मे दरम्यान मराठी व अन्य माध्यमासाठी तर तालुकास्तर प्रशिक्षण १८ ते ३० मे दरम्यान मराठी व अन्य माध्यमासाठी हे प्रशिक्षण आयोजित केले जाणार आहे.

इयत्ता दुसरीच्या शिक्षकांसाठी ३ दिवसांचे, तर तिसरी आणि चौथीच्या शिक्षकांसाठी ४ दिवसांचे प्रशिक्षण निश्चित करण्यात आले आहे. मराठी, उर्दू आणि इतर सर्व माध्यमांच्या शिक्षकांसाठी स्वतंत्र किंवा समन्वयाने प्रशिक्षणाची सत्रे घेतली जातील. विशेष म्हणजे, दुसरीच्या प्रशिक्षणाचा कालावधी कमी असला तरी, प्रशिक्षणाची सुरुवात मात्र सर्व वर्गासाठी एकाच तारखेला होणार आहे.

उर्दू माध्यमासाठी हे प्रशिक्षण केवळ राज्य आणि जिल्हा अशा दोनच स्तरांवर आयोजित केले जाणार आहे. सहसंचालकांनी सर्व प्रादेशिक विद्या प्राधिकरण आणि जिल्हा शिक्षण व प्रशिक्षण संस्थांना या संदर्भात जिल्हास्तर सुलभकांची नावे त्वरित कळवण्याचे आदेश दिले आहेत. नवीन अभ्यासक्रम वर्गात शिकवताना शिक्षकांना कोणत्याही अडचणी येऊ नयेत आणि अध्यापन प्रक्रिया सुलभ व्हावी, हा या प्रशिक्षणाचा मुख्य हेतू आहे.