आत्महत्या प्रकरण : सिंहगड संस्थेचे अध्यक्ष मारूती नवले यांच्यावर गंभीर आरोप 

एज्युवार्त न्यूज नेटवर्क 

सिंहगड संस्थेतील एका कर्मचाऱ्याने नुकतेच वेतन न मिळाल्‍याने आत्महत्या (Employee suicide) केली असून आणखी काही कर्मचारी आत्महत्येचा इशारा देत आहेत. ही गंभीर बाब असून सिंहगड इन्स्टिट्यूटमधील आर्थिक गैरव्यवहारातील (Financial irregularities at Sinhagad Institute) चौकशी करण्याची मागणी करीत संस्थेच्या ट्रस्टी स्नेहल नवले (Trustee Snehal Nawale) यांनी पत्रकार परिषदेत संस्थेचे अध्यक्ष मारुती नवले (President Maruti Navale) यांच्यावर थेट आरोप केले आहेत.

 स्नेहल नवले म्हणाल्या, सिंहगड इन्स्टिट्यूटची सुरुवात झाली, तेव्हा मारुती नवले उर्फ (एम. एन. नवले) हे अध्यक्ष होते, तर सुखदेव नवले उपाध्यक्ष होते. संस्थेचे पाच संस्थापक सदस्य होते. साधारणतः २०१६–२०१७ मध्ये सुखदेव नवले आजारी पडले. त्यांना अल्झायमर झाला आणि २०१८ मध्ये त्यांची स्थिती अधिक गंभीर झाली. २०२० पासून ते बेड रेस्टवर होते आणि मार्च २०२३ मध्ये त्यांचं निधन झालं. या संधीचा गैरफायदा मारुती नवले यांनी घेतला. २०१७ मध्ये मारुती नवले, त्यांचे कुटुंबीय, NEEMCO ग्रुप ऑफ कंपनी आणि जयश्रीराम शुगर फॅक्टरीवर इनकम टॅक्स विभागाने छापा टाकला. त्यावेळी मारुती नवले यांच्या कार्यालयातील वैयक्तिक लॉकरमध्ये सुखदेव नवले यांचे NEEMCO ग्रुपचे मूळ शेअर सर्टिफिकेट सापडले.

मारुती नवले यांनी संस्थेची यंत्रणा हातात घेऊन आम्हाला अंधारात ठेवले. माहितीच्या अधिकारात आम्ही बेनामी प्रकरणाचे कागदपत्र काढले. तेव्हा लक्षात आलं की सुखदेव नवले यांच्या आनंद सहकारी बँकेच्या खात्यातून बोगस व्यवहार झाले होते. यानंतर संस्थेची अधिक माहिती घेतल्यावर लक्षात आलं की, मारुती नवले यांनी सुखदेव नवले यांच्यासह अनेकांच्या बँक खात्यांतून गैरव्यवहार केले आहेत. संस्थेला मिळणारे पैसे संस्थेच्या बँक खात्यात जमा व्हायचे. हे पैसे मारुती नवले आनंद सहकारी बँकेत त्यांनी इतर लोकांच्या नावाने उघडलेल्या खात्यांत वर्ग करत होते. नंतर हे पैसे NEEMCO ग्रुप ऑफ कंपनीच्या खात्यात वळवले जात होते, जे त्यांच्या कुटुंबियांच्याच नियंत्रणात होते. हा गैरव्यवहार लोकांना किंवा धर्मादाय आयुक्तांना समजू नये म्हणून संस्थेचे ऑडिट रिपोर्ट केले गेले नाहीत.

ज्या लोकांना मारुती नवले यांनी फसविले , आर्थिक गंडा घातला आहे. त्यांनी उघडपणे समोर येऊन मारुती नवले यांच्या विरोधात तक्रार दाखल करावी. आम्ही त्यांच्या सोबत असू. आम्ही तुमच्यासमोर का आलोय? काल आमच्या संस्थेतील एका कर्मचाऱ्याने आत्महत्या केली आहे. आजही काही कर्मचारी आम्हाला फोन करून आत्महत्या करण्याचा इशारा देत आहेत. या पार्श्वभूमीवर आम्ही पत्रकार परिषद घेऊन संस्थेत नेमकं काय घडतं आहे हे स्पष्ट करत आहोत, असेही आरोप स्नेहल नवले यांनी केले आहेत.