SPPU:इंटर्नल मार्क्स एन्ट्रीला अडचणी; प्राध्यापक हैराण, परीक्षा विभागाकडून मुदतवाढ
eduvarta@gmail.com 
एज्युवार्ता न्यूज नेटवर्क
सावित्रीबाई फुले पुणे विद्यापीठाशी संलग्न महाविद्यालयांमधील विद्यार्थ्यांचे इंटरनल मार्क्स ऑनलाईन पद्धतीने भरण्यास प्राध्यापकांना अनेक अडचणी येत आहेत.त्यामुळे प्राध्यापक हैराण झाले असून विद्यापीठाने तांत्रिक अडचणी दूर कराव्यात,अशी मागणी केली जात आहे. दरम्यान,विद्यापीठाकडून तांत्रिक अडचणी दूर करण्याचे काम युद्ध पातळीवर सुरू आहे.तसेच इंटरनल मार्क्स भरण्यास परीक्षा विभागाकडून मुदतवाढ देण्यात येणार आहेत.
सावित्रीबाई फुले पुणे विद्यापीठाची संलग्न पुणे ,अहिल्यानगर आणि नाशिक जिल्ह्यातील महाविद्यालयामध्ये शिक्षण घेणाऱ्या विद्यार्थ्यांचे अंतर्गत गुण ऑनलाइन पद्धतीने भरण्यासाठी विद्यापीठाकडून स्वतंत्र पोर्टल उपलब्ध करून देण्यात आले आहे. परंतु, गेल्या दोन-तीन दिवसांपासून इंटरनल मार्क्स एन्ट्री साठी अडचणी येत आहेत. मात्र, सर्व्हर डाऊन होणे, अकाऊंट अचानक लॉग आऊट होणे, मार्क्स अपलोड न होणे अशा अनेक समस्या निर्माण झाल्या आहेत. त्यामुळे प्राध्यापक हैराण झाले आहेत.
विद्यापीठाच्या परीक्षा विभागाच्या पोर्टलवर मार्क्स एन्ट्री वेळेत झाली नाही तर निकाल जाहीर करण्यास विलंब होतो. तसेच सध्या अनेक प्राध्यापकांना जनगणनेचे काम देण्यात आले आहे. हे काम पाहून प्राध्यापकांना ऑनलाईन मार्क्स एन्ट्री करावी लागते. मात्र, तांत्रिक अडचणी निर्माण झाल्याने गुण कसे भरावेत असा प्रश्न प्राध्यापकासमोर निर्माण झाला आहे.
-------------
प्रत्येक विषयाचे किती विद्यार्थ्यांचे गुण भरले गेले याचा आढावा मी स्वत: घेत आहे. तसेच वेळेत गुण भरून घेण्याबाबत आवश्यक उपाययोजना केल्या जात आहेत. काही कारणास्तव ज्या विषयांचे गुण भरण्याचे काम पूर्ण झाले नाही, अशा विषयांचे गुण भरण्यास मुदतवाढ दिली जाणार आहे.
- राजेंद्र तलवारे, संचालक, परीक्षा व मूल्यमापन मंडळ, सावित्रीबाई फुले पुणे विद्यापीठ, पुणे
