आयुर्वेद, होमियोपॅथी, युनानी अभ्यासक्रमासाठी मुक्त फेरी सुरु, उद्या निवड यादी जाहीर होणार.. 

एज्युवार्ता न्यूज नेटवर्क 

राज्य सामाईक प्रवेश परीक्षा (State Common Entrance Examination) कक्षाकडून (सीईटी कक्ष) आयुष अंतर्गत येणाऱ्या अभ्यासक्रमाच्या मुक्त फेरीला सुरुवात झाली आहे. त्यानंतर उद्या ४ डिसेंबर रोजी या फेरीची  निवड यादी  (Selection list on December 4) जाहीर होणार आहे. आयुर्वेद, होमिओपॅथी आणि युनानी विषयांच्या पदवी अभ्यासक्रमाच्या (Ayurveda, Homeopathy and Unani Courses) चौथ्या फेरीनंतर ९६५ जागा रिक्त राहिल्या आहेत. त्यानंतर ही मुक्त फेरी राबवण्यात येत आहे. निवड झालेल्या विद्यार्थ्यांना ७ डिसेंबरपर्यंत प्रत्यक्ष प्रवेश घ्यायचा आहे. दुसरी स्ट्रे फेरी लगेच सुरू होणार असून १० डिसेंबरपर्यंत या अभ्यासक्रमांची प्रवेश प्रक्रिया पूर्ण करण्यात येणार असल्याची माहिती देण्यात आली आहे. 

आयुर्वेद (बीएएमएस) अभ्यासक्रमासाठी राज्यातील २२ सरकारी आणि १२३ खासगी अशा एकूण १४५ महाविद्यालयांमध्ये राज्य कोट्यासाठी ९ हजार ४५३ जागा उपलब्ध होत्या. चौथ्या फेरीअखेरीस त्यापैकी सरकारी महाविद्यालयांत ६४ आणि खासगी महाविद्यालयांमध्ये ५०४ अशा ५६८ जागा रिक्त आहेत. होमिओपॅथी (बीएचएमएस) अभ्यासक्रमासाठी राज्यातील एक सरकारी आणि ५४ खासगी अशा ५५ महाविद्यालयांमध्ये ३ हजार ७१२ जागा उपलब्ध होत्या. यात सरकारी महाविद्यालयात ५४ जागांचा समावेश होता. त्यापैकी ४३ जागा भरल्या असून खासगी महाविद्यालयांत ३ हजार ३९७ जागांवर प्रवेश झाले आहेत. 

हेही वाचा - महत्वाची बातमी! पोलीस भरतीचा अर्ज भरण्यास 'या' तारखेपर्यंत मुदतवाढ

त्यानंतर उर्वरित ३९० जागा अजूनही रिक्त आहेत. युनानी (बीयूएमएस) अभ्यासक्रमाची तीन सरकारी आणि चार खासगी महाविद्यालये आहेत. या ७ महाविद्यालयांमध्ये मिळून ३५० जागा उपलब्ध आहेत. त्यापैकी सरकारी महाविद्यालयांमधील १५३ पैकी १५१ आणि खासगी महाविद्यालयांमधील १९७ पैकी १९२ जागा भरल्या असून ७ जागा अद्याप रिक्त आहेत. या तीनही अभ्यासक्रमांमध्ये रिक्त असलेल्या ९६५ जागांसाठी आता महाविद्यालयनिहाय मुक्त फेरी होणार आहे. 

त्यासाठीची विद्यार्थी नोंदणी मंगळवारपासून सुरू झाली. या नोंदणीसाठी ३ डिसेंबर अखेरची मुदत असेल. त्यानंतर ४ डिसेंबर रोजी विद्यार्थ्यांची निवड यादी जाहीर केली जाईल. या यादीत नाव आलेल्या विद्यार्थ्यांना ५ ते ७ डिसेंबर या काळात प्रवेश निश्चित करायचा आहे. दुसऱ्या मुक्त फेरीची निवड यादी ८ डिसेंबरला जाहीर होणार असून ९ आणि १० डिसेंबरला या यादीतील विद्यार्थ्यांनी प्रवेश नोंदवायचा आहे. १० डिसेंबरनंतर कोणतीही मुदत विद्यार्थ्यांना मिळणार नसून ही प्रक्रिया पूर्ण होणार असल्याचे सीईटी कक्षाने जाहीर केले आहे.