CET Cell : संस्थास्तरीय प्रवेशासाठी कडक नियम; अभियांत्रिकी प्रवेशासाठी सीईटी गुणवत्तायादी अनिवार्य
महाराष्ट्र सीईटी (CET) अंतर्गत संस्था-स्तरीय प्रवेशांसाठी अधिकृत गुणवत्ता यादीचे पालन करणे अनिवार्य आहे. 'कॅप' (CAP) नियम, महाविद्यालयांची मार्गदर्शक तत्त्वे आणि फसवणूक रोखण्यासाठीच्या उपाययोजनांची माहिती जाणून घ्या.
Eduvarta
एज्युवार्ता न्यूज नेटवर्क
महाराष्ट्र राज्य सामाईक प्रवेश परीक्षा कक्षाने (सीईटी कक्ष) तंत्रशिक्षणाअंतर्गत बी.ई., बी.टेक, एमबीए आदी व्यावसायिक अभ्यासक्रमांच्या संस्थास्तरीय प्रवेश प्रक्रियेसाठी स्पष्ट सूचना जारी केल्या आहेत. या सूचनांनुसार संस्थास्तरावरील प्रवेशासाठी सीईटी कक्षाने उपलब्ध करून दिलेल्या विद्यार्थ्यांच्या गुणवत्ता यादीचाच आधार घ्यावा लागेल. महाविद्यालयांनी अधिकृत गुणवत्ता यादी तयार करून ती सूचना फलकावर तसेच स्वतःच्या अधिकृत संकेतस्थळावर प्रसिद्ध करणे बंधनकारक आहे. यामुळे प्रवेश प्रक्रिया अधिक पारदर्शक आणि गुणवत्तेवर आधारित राहील, असे स्पष्ट करण्यात आले आहे.
अलिकडे नामांकित महाविद्यालयांमध्ये प्रवेश मिळवून देण्याचे आमिष दाखवून विद्यार्थी व पालकांची आर्थिक फसवणूक होण्याच्या घटना समोर येत आहेत. या पार्श्वभूमीवर तंत्र शिक्षण विभागाचे प्रभारी संचालक डॉ. प्रमोद नाईक यांनी सर्व महाविद्यालयांना सीईटी कक्षाच्या सूचनांचे काटेकोर पालन करण्याचे आवाहन केले आहे. त्यांनी सांगितले की, पदवी व पदव्युत्तर अभ्यासक्रमांच्या संस्थास्तरीय तसेच केंद्रीय प्रवेश प्रक्रियेनंतर रिक्त राहिलेल्या जागांसाठी पारदर्शकता, गुणवत्ता आणि नियमांचे पालन सुनिश्चित करणे आवश्यक आहे.
सीईटी कक्षाच्या सूचनेनुसार संस्थास्तरीय प्रवेश प्रक्रिया सर्व केंद्रीय प्रवेश फेऱ्या (कॅप) पूर्ण झाल्यानंतरच आणि विद्यार्थ्यांच्या गुणवत्तेनुसारच राबविण्यात यावी. महाविद्यालयांनी प्रवेशाचे नियम, प्रक्रिया व माहिती पुस्तिका आपल्या अधिकृत संकेतस्थळावर प्रसिद्ध करणे अनिवार्य आहे. इच्छुक विद्यार्थी संबंधित महाविद्यालयात थेट अर्ज करू शकतात किंवा कॅप पोर्टलवरून संस्थास्तरीय ‘ऑप्शन फॉर्म’ भरू शकतात. प्रवेश निश्चित झाल्यानंतर महाविद्यालयाने त्याची नोंद कॅप पोर्टलवर तात्काळ करणे बंधनकारक आहे.
विद्यार्थी व पालकांना सावध राहण्याचे आवाहनही करण्यात आले आहे. केंद्रीय प्रवेश फेऱ्या पूर्ण होण्यापूर्वी कोणत्याही एजंट, मध्यस्थ किंवा प्रवेश मिळवून देण्याचा दावा करणाऱ्या व्यक्तींच्या आमिषाला बळी पडू नये. सोशल मीडिया, खासगी समुपदेशक किंवा अनधिकृत लिंकद्वारे प्रसारित होणाऱ्या खोट्या माहितीवर विश्वास ठेवू नये. अफवा किंवा दिशाभूल करणाऱ्या बातम्यांकडे दुर्लक्ष करून अधिकृत मार्गानेच प्रवेश प्रक्रिया पूर्ण करावी, असे सीईटी कक्षाने स्पष्ट केले आहे.
