JEE चे विद्यार्थी संभ्रमात; NTA कडून फेअर निकालाची मागणी
जाहीर झालेल्या निकालात प्रत्येक 11 हजार 700 विद्यार्थ्यांमागे काठीण्य पातळीत फरक पडल्यामुळे स्कोर आणि पर्सेंटाइलमध्ये बरीच तफावत दिसत आहे
eduvarta@gmail.com 
एज्युवार्ता न्यूज नेटवर्क
जानेवारी 2024 मध्ये घेतलेल्या देशातील सर्वात मोठ्या अभियांत्रिकी प्रवेश परीक्षेच्या (JEE Main) च्या पहिल्या सत्राचा निकाल (JEE Main 2024 Result) नॅशनल टेस्टिंग एजन्सी (NTA) ने आज म्हणजेच मंगळवार रोजी जाहीर केला. पण निकाल जाहीर झाल्यानंतर स्कोअर आणि पर्सेंटाइल त्यांच्यातील फरकामुळे विद्यार्थ्यांमध्ये संभ्रम निर्माण झाला असून नाराजीचा सूर उमटत आहे. काही विद्यार्थी थेट सोशल मीडियावर NTA कडून फेअर निकालाची मागणी (Fair Result Demand) करत आहेत.
JEE च्या jeemain.nta.ac.in या अधिकृत वेबसाईट वर निकाल जाहीर करण्यात आल्यानंतर यामध्ये विद्यार्थ्यांना पडलेले गुण आणि टक्के यात बरीच तफावत असल्याचे दिसून आले आहे. अनेक विद्यार्थ्यांनी टक्केवारीच्या तुलनेत त्रुटी असल्याचे सांगितले आहे. ही परीक्षा 27 जानेवारी ते 1 फेब्रुवारी या काळात सकाळी आणि संध्याकाळी अशा दोन सत्रामध्ये घेण्यात आली होती. विषेश म्हणजे या वेगवेगळ्या तारखांना वेगवेगळ्या सत्रांमध्ये परीक्षा दिलेल्या उमेदवारांचे मार्क वेगवेगळे असून सुद्धा यांना मिळालेले टक्के मात्र एकच आहेत. 27 जानेवारी रोजी सकाळच्या सत्रात 233 गुण मिळालेल्या आणि संध्याकाळच्या सत्रात 211 गुण मिळालेल्या दोन्ही उमेदवारांना 99 पर्सेंटाईल देण्यात आले आहेत.
तर 29 जानेवारी रोजी सकाळच्या सत्रात 203 गुण मिळालेल्या आणि संध्याकाळच्या सत्रात 212 गुण मिळालेल्या दोन्ही उमेदवारांना 99 पर्सेंटाईल देण्यात आले आहेत. तर 30 जानेवारी रोजी सकाळच्या सत्रात 193 गुण मिळालेल्या आणि संध्याकाळच्या सत्रात 191 गुण मिळालेल्या दोन्ही उमेदवारांना 99 पर्सेंटाईल देण्यात आले आहेत. 31 जानेवारी रोजी सकाळच्या सत्रात 172 गुण मिळालेल्या आणि संध्याकाळच्या सत्रात 151 गुण मिळालेल्या दोन्ही उमेदवारांना 99 पर्सेंटाईल देण्यात आले आहेत. तर 1 फेब्रुवारी रोजी सकाळच्या सत्रात 161 आणि संध्याकाळच्या सत्रात 172 गुण मिळवणाऱ्या उमेदवाराला सुद्धा 99 पर्सेंटाईल मिळाले आहेत.
या संदर्भात 'एज्युवार्ता'शी बोलताना स्पर्धा परीक्षांचे मार्गदर्शक दुर्गेश मंगेशकर म्हणाले, "जाहीर झालेल्या निकालात प्रत्येक 11 हजार 700 विद्यार्थ्यांमागे पर्सेंटाईल बदलत आहे. काठीण्य पातळीत फरक पडल्यामुळे स्कोर आणि पर्सेंटाइलमध्ये बरीच तफावत दिसत आहे. विद्यार्थी संख्या वाढल्यामुळे कटऑफ वाढणार आहे. NTA ने पर्सेंटाईल बाबतचा हा गोंधळ सोडवून विद्यार्थ्यांच्या मनातील संभ्रम दूर करावा".
