भारतीय विद्यार्थ्याची अमेरिकेत गोळ्या घालून हत्या

एज्युवार्ता न्यूज नेटवर्क 

हैदराबाद येथील एका २६ वर्षीय विद्यार्थ्याची अमेरिकेतील वॉशिंग्टनमध्ये गोळ्या झाडून हत्या (Indian student murdered in America) करण्यात आली आहे. के. रवी तेजा (K. Ravi Teja) असे मयत तरुणाचे नाव असून तो चैतन्यपुरी येथील आरके पुरम येथील रहिवासी होता.  2022 मध्ये पदव्युत्तर पदवीचे शिक्षण घेण्यासाठी यूएसला गेला होता. नुकतेच त्याने आपल्या पदव्युत्तर पदवीचे शिक्षण पूर्ण करून सध्या तो तिथे नोकरीच्या शोधात असल्याची माहिती समोर आली आहे.

या प्रकरणी गुन्हा नोंदवण्यात आला आहे. हल्लेखोर कोण होते? त्यांनी नेमकी ही हत्या का केली? याचा पोलीस शोध घेत आहेत. रवी तेजा याच्या मृत्यूमुळे त्याच्या कुटुंबावर दु:खाचा डोंगर  कोसळला आहे. वडील चंद्रमौली यांनी या घटनेबाबत तीव्र दुःख व्यक्त केलं आहे. “मी आज माझा मुलगा गमावला आहे. माझा मुलगा जिवंत अमेरिकेत गेला होता आता त्याचा मृतदेह भारतात येतो आहे. कुणावरही अशी वेळ यायला नको.” असं त्यांनी म्हटलं आहे. 

परराष्ट्र मंत्री एस जयशंकर यानी या घटनेवर दु:ख व्यक्त केलं आहे. ते म्हणाले की, "आमचे वाणिज्य दूतावास कुटुंबाला शक्य ती सर्व मदत करत आहे," असे त्यांनी X वर एका पोस्टमध्ये म्हटले आहे. शिकागो येथील भारतीय वाणिज्य दूतावासानेही या विरोधात त्वरित कारवाई करण्याची मागणी केली आहे. विद्यार्थ्याच्या हत्येसाठी जबाबदार गुन्हेगाराला लवकरात लवकर अटक करण्याची मागणी देखील करण्यात आली आहे.