अभियांत्रिकीच्या पहिली यादीत १ लाख २६ हजार विद्यार्थ्यांना प्रवेशाची संधी.. 

एज्युवार्ता न्यूज नेटवर्क

राज्य सामाईक प्रवेश परीक्षा (State Common Entrance Test) कक्षाकडून नुकतीस अभियांत्रिकी प्रथम वर्ष (बीई/ बीटेक) एमबीए पदवी अभ्यासक्रमाची  (Engineering First Year (BE/BTech), MBA Degree Course) पहिली यादी जाहीर (First list announced) करण्यात आली.या यादीमध्ये तब्बल  १ लाख २६ हजार ४५८  पात्र उमेदवारांना प्रवेशाची संधी (Admission opportunity for eligible candidates) मिळाली आहे. पहिल्या फेरीत प्रवेशाची संधी मिळालेल्या विद्यार्थ्यांना १६ ते १८ ऑगस्ट दरम्यान प्रवेश घ्यायचे आहेत. ज्या विद्यार्थ्यांना पहिल्या फेरीत पहिल्या पसंतीनुसार महाविद्यालयातील जागा मिळाली आहे, त्यांना प्रवेश घ्यावाच लागणार आहे. अन्यथा ते पुढील फेरीत सहभागी होण्यास पात्र ठरणार नाहीत. प्रथम पसंती व्यतिरिक्त अन्य पसंतीक्रम मिळाला आहे, असे विद्यार्थी पुढील फेरीसाठी पात्र असणार आहेत.

अभियांत्रिकी प्रथम वर्ष (बीई/ बीटेक) अभ्यासक्रमासाठी अर्ज नोंदणी केलेल्या  १ लाख ७६ हजार १११ विद्यार्थ्यांपैकी १ लाख २६ हजार ४५८ विद्यार्थ्यांना पहिल्या फेरीत स्थान मिळाले आहे. प्रसिद्ध करण्यात आलेल्या यादीमधील ज्या उमेदवारांना प्रथम पसंती व्यतिरिक्त अन्य पसंतीक्रम मिळाला आहे, अशा उमेदवारांना दुसऱ्या फेरीत अधिक चांगले महाविद्यालय मिळवण्यासाठी ‘नॉट फ्रीझ’ पर्याय निवडावा लागणार आहे.

दुसऱ्या निवड यादीची  काही दिवस प्रतीक्षा करावी लागेल. तसेच राज्य सामाईक प्रवेश परीक्षा कक्षाकडून व्यवस्थापनशास्त्र अभ्यासक्रम (एमबीए) प्रवेश प्रक्रियेची देखील पहिली फेरी जाहीर केली आहे . यासाठी जवळपास ४६ हजार १६५ जागांसाठी ५७ हजार ६१७ विद्यार्थ्यांनी पसंतीक्रम भरले होते. यापैकी ३३ हजार ९४२ विद्यार्थ्यांना पहिल्या फेरीत प्रवेशाची संधी मिळाली आहे. या विद्यार्थ्यांना १६ ते १८ ऑगस्ट दरम्यान प्रवेश घ्यायचा आहे.

अभियांत्रिकी प्रथम वर्ष पदवी अभ्यासक्रमाला विद्यार्थ्यांनी पसंती देत विक्रमी नोंदणी केली. गतवर्षीच्या तुलनेत अर्ज करणाऱ्यांची संख्या ३४ हजारांनी वाढली आहे. याचा परिणाम पहिल्या प्रवेश फेरीच्या यादीवर दिसून येत आहे. अंतिम गुणवत्ता यादीमध्ये पात्र ठरलेल्या १ लाख ९२ हजार ३९८ विद्यार्थ्यांपैकी पहिल्या प्रवेश फेरीसाठी १ लाख ७६ हजार १११ विद्यार्थ्यांनी पसंतीक्रम भरले होते. यापैकी १ लाख २६ हजार ४५८ विद्यार्थ्यांना पहिल्या प्रवेश फेरीमध्ये प्रवेशाची संधी मिळाली आहे. ४९ हजार ६५३ विद्यार्थ्यांची नावे प्रतीक्षा यादीत आहेत.