'पॅट' प्रश्नपत्रिका फुटल्याची शिक्षण विभागाची कबुली, 21 यु ट्युब चॅनेलवर बंदीची कारवाई.. 

एज्युवार्ता न्यूज नेटवर्क 

केंद्रीय शिक्षण विभागाच्या स्टार्स उपक्रमाअंतर्गत (STARS activities)  महाराष्ट्र राज्य शैक्षणिक संशोधन व प्रशिक्षण परिषदेमार्फत (SCERT) 2024-25 साठी घेण्यात येणाऱ्या संकलित मूल्यमापन चाचणी (PAT) परीक्षेतील इयत्ता नववीची प्रश्नपत्रिका फुटली (The ninth question paper was leaked) असून प्रश्नपत्रिका कशी सोडवावी या संदर्भातील व्हिडिओ चांगलाच व्हायरल (Video goes viral) झाला आहे. त्याबाबत शिक्षण विभागाने कबुली दिली असून या संदर्भातील व्हिडिओ व्हायरल करणाऱ्या 21 यु ट्युब चॅनेलवर बंदीची कारवाई करण्यात येणार असल्याची माहिती SCERT चे संचालक राहुल रेखावार (SCERT Director Rahul Rekhavar) यांनी दिली आहे. 

शैक्षणिक वर्ष  2023-2024 पासून प्रतिवर्षी तीन वेळा वर्ग  3 ते 9 साठी प्रथम भाषा, इंग्रजी तृतीय भाषा आणि गणित या विषयांसाठी शासकीय, स्थानिक स्वराज्य संस्था आणि अनुदानित शाळा व तुकड्यांमधील विद्यार्थ्यांसाठी प्रश्नपत्रिका सर्व माध्यमांमध्ये बनवून व पाठवून आयोजित करण्यात येते. एप्रिल 2025 मध्ये अशी सहावी परीक्षा घेण्यात येत आहे. 8 एप्रिल रोजी  इयत्ता 8 वी व इयत्ता 9 वी च्या प्रथम भाषा विषयाची PAT परीक्षा असताना त्यापूर्वीच काही युट्युब चॅनेलवर ही प्रश्नपत्रिका तिच्या उत्तर पत्रिकेसह दाखविण्यात येत असल्याचे निदर्शनास आले. या सर्व चॅनेल विरुद्ध गुन्हा दाखल करण्याची प्रक्रिया करण्यात येत आहे आणि पोलीस विभागाच्या मदतीने सदर चॅनेल बंद करण्याचा प्रयत्न करण्यात येत आहे, असे रेखावर यांनी म्हटले आहे. 

संकलित मूल्यमापन चाचणी २ च्या गोपनीयतेचा भंग केल्याप्रकरणी स्कॉलरशिप स्टडी, ट्विटर एडियम, नॉलेज - गंगा, अनिकेत, ए ए क्लासेस, प्रशांत वारे आर्ट्स, झेन झेड लर्निंग बाय एम _आर, एच टी स्टडी 2.0, लर्न विथ अनु 21, @ सेमी मराठी क्लास, भाषण मित्रा, आर डी क्लब, एस बी सुरज क्रिएशन, एम एच एज्युकेशन, वाय सी एज्युकेशन महाराष्ट्र, Shivstusti रायटिंग, स्कॉलरशिप स्टडी, मी गुरुजी,  एम एच स्टडी, स्टडी टाईम, स्टडी पार्टनर या चॅनलवर गुन्हा दाखल करण्यात आला असून हे चॅनल बंद करण्याची मागणी करण्यात आली आहे. 
_______________________________

महाराष्ट्र राज्य शैक्षणिक संशोधन व प्रशिक्षण परिषदेच्या माध्यमातून घेतल्या जाणाऱ्या पॅट परीक्षेचा पेपर फुटला असल्याची धक्कादायक माहिती समोर आली आहे. यापूर्वीही पॅट परीक्षेच्या प्रश्नपत्रिकेचे गठ्ठे रस्त्यावर सापडल्याचे आढळून आले होते. एससीईआरटीने परिपत्रक प्रसिद्ध करून शिक्षकांनी कोणत्या तारखेला परीक्षा घ्याव्यात आणि निकाल कसे लावावेत या संदर्भातील आदेश नुकतेच दिले होते. परंतु, शिक्षण विभागाला परीक्षा संदर्भातील गोपनीयता ठेवता आले नाही. त्यामुळे 'दुसऱ्या सांगे ब्रह्मज्ञान आपण मात्र कोरडे पाषाण' असाच काहीसा प्रकार एससीईआरटी च्या बाबत दिसून येत आहे.

कल्पेश यादव, सहसचिव युवासेना (उबाठा)